KONPOLJE – Red je bilo nešto učinit, nema niš od side (čekanja). A kako je konpoljska crikva don Angjelu prva plovanija u koj je un gospodar, red mu se bilo podnadit i sabirat novce. Jerbo je crikva iznutra, da te Bog slobodi, prije bi čovik rekal da na štalu nalikuje, a ne na božji hram. Kako od države niš, red je bilo pouzdat se u se i u svoje kljuse.
A kako don Angjelo pozne 'i boga i vraga!' (Bože nan na vomu prosti), bacil se un po svitu i zaišći vamo, zaišći namo i novci počeli curit na knjižicu. I to borme lipo curit. Aj neka, takal se narod u dušu. A namo mu neki zamirali „vidi nan popa, samo po Umagu i po tenisu šeće, kakov je to pop!“. Al se pokazalo da ne šeće badave, dal Prka, dala Privredna banka poprilično novac. Dali su još nekvi drugi iz tenisa isto novce. Ča sad? Ima li sadaj na dona i na njegov tenis prigovorov? Red in je bilo zamučat, a don Angjela, kako stvari stuidu, treba čin češće tirat na taj vratarnji tenis, morda ča bude. Kod kuće sidit i ćućit, ma niš od toga. Red se u svit bacit, nunde kadi novac ima.
Unda, unda se don Angjelo bacil i po popima i po biškupima, naj kunu, naj dvi, borme se i tote lipo skupilo. A kako i ne će, kad naš don Angjelo uvati kukat na konpoljsku crikvu, moraš mu dat pa da ti je srce tvrđe od kamena. Moral bi čovik, el, š njim skupa plakat, a ne samo novce dat. Izvježbal se fort.
I ča sad s tin novciman? Evo, edva da je berma u nedilju pasala, pop sumiral crikvu iznutra svu razdrndat. Verni narod izvukal klupe van, šteta da ni Jurjeva pa da i užgedu, a moredu evo i za Ivanju. Sadaj da trnom po crikvi projdeš, nemaš uč više zapet. A sve to jerbo se kriće u uređenje crikve iznutra. A ča će se sve uređevat? Kako nan je don Angjelo kazal, najprvo je red kamene ploče na tlu popravit. Propale, nakrivile se, kad po crikvi šećeš moraš pazit da se na vrv glave ne skotrobaniš i u sred crikve smrtno ne ogrišiš. Unda kase to napravi, red je zide krpat, uno ča je ispucalo i ča tako godinami i godinami stui melton počepit, uno ča se naklabučilo odljuskat, nunde kadi je bila lenperija nabacit nabac, uuuuu, ima tote posla koliko oš. A kase to sve napravi unda lipo pofarbat, oko punaštar vako, nebo nako, gori vrć zvezdice i tako to.
Još ima don Angjelo u planu nešto delat, al ne će tat da kaže, samo mu se brk podsmijuje. I recte don, i recte, ne će. Mi jopet da pop ne smi lagat, a un nami da ne laže, jerbo da mučanje i uno ča se premuči ni grij. Tako ti je to s popon, neš s takovin lako na kraj.
A sve to ča je don Angjelo zaplaniral, to mora bit gotovo do letnje Stipanje i zbora. I nove klupe dajdu dotad bit gotove, sve novo. To je nase zel pop Šimunović, i ve ke su iz crikve iskifelile van, i te je un pred … uuuuuu, ki zna koliko godin negdi iz Primorja dopeljal.
Ufat se u Boga da sve tako bude.
M. Krančević