KONPOLJE – Ako niki ne zna prebrat vrime kaće ča delat, unda zna don Angjelo. U tomu je pravi majstor, pa ča god ki rekal da rekal. Tako un u sred zime meće grijanje u crikvu. Ni prije ni kašnje. Edni velidu da kudaj sad, drugi velidu bolje igda neg nigda. Ma biće da su na istomu, el.
I baš vi dani un raskaplje pod u crikvi, a namo je letos farbal, kamene škrelje u crikvi poravnaval. Un kaj naša komunalna i cestarska poduzeća, čera asfaltiradu, a jutra već kopljedu.
A ča se more, nek se Božja vrši (doduše, Konpoljčani bi to melo drugovačije rekli, al beseda je u crikvi i popu pa ni lipo). Samo moradu dobro podnoge gljedad kad se gredu pričestit da se ne potrknedu i ne skotrobanidu, i da in grij iz ust ne izleti, Bože nan prosti.
M. K.