KONPOLJE – Don Angjelo zapel u blagoslovu kuć u – Padelicami. Ni mu se ugodalo, samo je na red došlo sedam kuć. A mora se i razumit, najprvo je uitro imal mrtvačku mašu, unda je došal na skup građanske inicijative ZA OTOČAC i tamo kazal ča je kazal, ki razumil, ki ne razumil. Unda je tekar utetivil po blagoslovu, a već prošlo podne. Bog te stvoril. I već kako to gre, daj prisedi ode, daj popripovidaj nunde i – tempus fugit, veli un, ma ča god to značilo. Kase sve sračuna, dost je i obašal.
A u Dolnjemu selu pop će ić po kućami od Padelic pa sve do Potkraj u utorak, od 10 uri. Morda će mu i brže ić, počela škola, nejdu moć dica š njin. Lagušan je don Angjelo, leti kaj tičica, iće to, ma kako ne. Jerbo eto ti Fajbanove, 20. sječnja, a na Fajbanovu uveče već moredu mačkari ić. A kad mačkari krenedu, pop i mačkari ne moredu i ne smidu zajedno, tako to odvajkad bilo u Konpolju. Al se sadaj sve prominilo, samo Rić Božja ni.
M. K.