OTOČAC – Čera pa ga-ga, pa kva-kva. Pa ki je vratar sadaj? Pogljedaj s vu stranu kuće – niš, pa pogljedaj s nu stranu kuće – niš. A to sve i dalje gače i kvače. I pas uši naćulil, al pametan pas, pogljeda u un u višak, o-oooo, ima se ča i vidit – puno nebo divlji rac, gusak, česa li. Pernato je, da prše po zraku – prše, da je veličko – veličko je, pa ča bilo da bilo.
Izgljeda da se ta pernata stvorenja sama sebi čudidu kudaj su brže trgnula nazad. A pod njimi se sve beli od sniga, ma kakova vratarnja teplina! Rupilo to jadno iz Afrike, odakljen li, nazad vamo k nami, il još gori u tu Evropu. Preračunalo se. Eeeee, da su te guščurine il race slušale naš Državni idrometrološki zavod, ne bi na put krićale. Al za zlo svoje nisu, pa čan in dobri Bog da.
I.B.