KONPOLJE – Neki veli: ima veze, drugi vičedu: nema veze, pa aj sadaj reci ki je u pravu. A dela se o slivami, ma dela se o rakiji. Jerbo su u Konoplju slive rodile kaj munjene samo oko crikve. Ti ča velidu da ima veze, uni poručujedu da je naj narod oko crikve više na maši pa da su zato i slive dobro rodile. Ni drugi velidu da to nema veze s mašon i crikvon, al ne znadu reć zač unda nisu ednako svudaj rodile. Tako da to pitanje ostaje fort otvoreno i nema odgovora.
A slive oko crikve rodile samo tako, ne panti se već unazad puno godin da su baš tako rodile. I stare, i mlade, i ne kržljave i ne ke su se skoro pa osušile. Grane se savijadu do crne zemlje, toliko su rodile. I pucadu, kako ne. Neki podbačadu trkljami, neki niš, ma ki more nadat toliko trkalj i podbočajev? Unda neki velidu, eto za kaj dan biće red trest i brat i š njimi u bačvu. Drugi velidu dajdu doć u isto vrime kadaj i krunpir pa ki more sve dospit odedanput. A sve umiruje don Angjelo, un vajk gulsa po svomu „da posla puno a trudbenikov malo“. Da tako piše u Svetomu pismu. Morda i piše. A kad ga se pita zač su slive oko crikve rodile kaj munjene, samo se slatko nasmije. A ča taj njegov smij znači, Bog zna.
M. K.