OTOČAC – Ki nema žene, čija žena ima dvi live, red je na placu! Nema druge. Jesen pokazala prve zube, zastudilo, nema se ča više čekat. Treba sukneni čerap i cokalj, o vima kupovnima moremo se samo smijat. Nema dok ti ne obuješ suknene čerape. A još velidu da to i zdravo, antialergijsko, da se noga manje švica i ča ti ja znan ča sve ne. Da je puno bolje od voga umjetnoga, plastičnoga. Eto, moja pokojna baba Anka, mrak joj na putu, vajk je divanila da je domaće bolje i zdravije, al ki joj je veroval. A sadaj dokturi kaj to odakrli pa na sva usta divanidu li divanidu. Zač su ti dokturi unda u tolike škole išli i došli do toga ča moja baba, Bog je pomiluj, skoro nepismena znala, a? Kako tomu vratru ime?
A na placi ima sukneni čerap, i ni obični, ali i zane ki se ojdu podičit ima i lipi ušaro pleteni. Pa nek prebere komu se ča dopada. Jerbo kako stvari stuidu, ne će sukneni čerap još dugo na placi bit, ma kakov, to još dok pletetu babe, još i još, a kad nji Bog zame k sebi, čerapa će izumrit. Nove žene to ne znadu, nejdu, to njimi fuj, ima za kupit. Il imadu dvi live.
I.B.