OTOČAC – Vajk je bil običaj da se nakon maše na Božić ljudi uvatidu ukolo i zaigradu pred crikvon. Meni moja baba, Bog je pomiluj, pripovidala da je negda, el, kad je bilo naroda kaj plive, igralo po nekoliko kol. Kako je bilo sniga, a ne kaj sadaj, naj narod bi ugazil snig da je to bilo ravno i glatko kaj caklo. I unda se pivalo i napivavalo, pazilo se ča se piva, nisu se pred crikvom pivale kojekakove prdačine, ma Bože slobodi, van fine pisme. Narod igra, a na studeni se sve ižnjega puši.
Eto, da se običaj ne utre, i voga Božića se uvatilo nekvo kolce. Dva naprvo, edan nazad. Ni tote bilo „napovrate“ i tako to, bilo bi nog poprebijani da bi cela itna pomoć ličko-senjska imala posla. Malo ljudi, a kad in se prebrojidu godine, moga mi Boga da bi godine dospile sve do Isusovoga rođenja, borami bi. A čaš kad mladi nema i nejdu.
I sve tako malo kolo da bi se utišilo pivalo je: - Okreni se moje kolo malo, da si veće ne bi ni valjalo. Kad ni boljega, dobro i vakovo. Ni mu ubrke pljuvat, ni.
I.B.