OTOČAC –Kako je negda staromu narodu bilo lipo dok ni bilo radija, televizije, interneta i tako ti čud. Ni blejal u to, van je sve sam promatral i po tomu se ravnal. Osobito o tomu kakovo će vrime bit. Evo, rećemo, sv. Medardo. Taj sveti Medardo je bil opasan svetac, kako un reče, takov će leto bit, nikako drugovačije. Jerbo ako na sv. Medardu pane samo edna kap kiše, biće 40 dan kišovito. Pa ti kosi i spravljaj, pa ti žanji! Taj Medardo je bil čera, a bilo lipoooo, da lipše ni moglo bit, i ako mu je za verovat, biće dalje lipo i teplo vrime, brez kiše. A jopet, ako ne bude kiše, oće li suša sve pobrat, pa čij si unda?
I da Medardo ne dolazi sam po sebi, tote su i - kvatre. Negda je stari narod jako veroval kvatrami. Četire su ugodini, grgurevske, dovske, mijoljske i božićne. Sve kvatre su ispred blagdanov, samo sveti Duv nosi svoje kvatre na leđi, tako su vikale stare babe, i borme su imale pravo. Negda su se kvatre biližile u kalandare, sada više ne, retko kadiš nać da su kvatre zabiližene. Eto, ve godine kvatre su od srede, 12. lipnja, pa do subote. I jopet je narod veroval da kakovo jutro osvane kase kvatre rastrgujedu, da će takovo vrime bit do drugi kvatar. Pa sadaj akojdu dovske kvatre ostavit lipo, eto ti suše, po svoj priliki.
Tako to narodna metrologija, bez Vakule. I još narod veli da je to negda sve pogajalo, a da danaske niš ne pogaja, ni Medardo, ni kvatre. More bit. A kako će i pogajat ako narod uto neveruje?
M.K.