ŠVICA – Danaske je Telova, velik blagdan. Ne samo crkveni, van je i država Telovu zela podase i to je državni blagdan i ne dela se. A na Telovu pop reče mašu i unda ide prošešija oko crikve. Tako je danaske i pop Mila zel monstrancu u ruke i u prošešiju s vernin švičkin narodon. Pa kad je prošešija smirila, jopet nazad u crikvu.
A kad je Švica u pitanju, ni popu Mili lako, tote je berma u nedilju u 11 uri, tote biškup, tote popi, posla koliko oš. A unda već jutra dan zbor svetoga Ivana Krstitelja, a to je odvajkad bil velik zbor u Švici, glavni zbor, kako i spada. Njega će peljat don Angjelo, baš mu se poklopilo, prije 40 godin je na taj dan i zaređen. Treba to preživit, borami da. Je da verni narod pomaže, al treba sa svin tin, ča bi rekla teta Lucka, treba sa svin tin „urigirat“.
M. K.