Lika nekretnine

Došal vrag na kukuruz

Objavljeno: 21.08.2019

OTOČAC – Baba Loza, Bog je pomiluj, oduvik je vikala, a već joj ni košća ni, da je vrag došal na svit. E sadaj, ni una vajk mislila na samoga Patrnjaka, Bože nas slobodi, van na narod i njegove navade, da se sve minja, da to sve novo njoj ni pod krljak išlo, mada nigda ni nosila krljak, van rubac, a tako je divanila. Jezičari bi rekli da je to iz stilogeni razlogov, a ča je to, nek vratar pogodi.

Čini se da je baba Loza imala pravo, došal vrag na svit i to ti je. Evo danaske na placi, je da se prodaje paradajzel, da se prodaje paprika, pa mavunje se prodajedu, ima i smokav, jopet toga zelenoga lišća, i to se prodaje, al prodajedu se i kljipi zelenoga kukuruza. Kljipi kukuruza??? Aaaaaa, i kljipi kukuruza se prodajedu u sred Otošca, Bože nan prosti, konda smo u sred Zagreba pa se prodaje. Došal vrag na svit pa niki nema ni dvi-tri batuke kukuruza da ima za speć na ognju. I to se prodaje, i to se kupuje. Konda smo najveća gospoda na vomu svitu! I zato ni baba Loza bila munjena, ma kakov munjena, pametna una bila, prenda ni škole ni vidila, a kamoli da je prošla kroz kurikul. Jerbo da je krozanjega prošla, i ona bi, Bože nan prosti i ne zamiri, kupovala kljipe kukuruza na placi, a ne bi šla u svoj kukuruz i nakinula kljipi i spekla. Eto, došal vrag na svit.

I.B.

 

 
PROLJEĆE NA PLITVIČKIM JEZERIMA
LiveCam Otočac
SenjskaBura.hr
GlasLike.hr