Lika nekretnine

Suknena akunpunktura

Objavljeno: 23.01.2020

OTOČAC – Ni vomu novomu svitu lako, ma vratar mu je lako, osobito roditelju edan i roditelju dva (znate, tako će se to morat divanit ćaći i materi, pa mi već unaprvo treniramo). Osobito ako dicu imadu, a srićon i puno nemadu. Jerbo dica su ti danaske kaj bezdana jama, ma koliko god daješ, nigda dost, ne more se nadelat toliko koliko njimi treba za svakakove lopošćine, ne, ne, ne more, ne more. Te kupi ovo, te kupi ono, kupi vratre ako ni novac. Pa sve nekva finina, roba s nekvima značićima, a to skupu kaj pateka, skupo uto i gljedat, a kamoli kupit. Al mora se, ča će narod reć. I unda vratar spram vratra, pa kupuj, pa rdaj novce, pa bacaj novu robu, pa jopet kupuj drugu. I tomu nigda kraja, a unda se krivimo kako zagađujemo prirodu.

A kako je to negda bilo, kase sitin dok san dite bil. Edne pantalonice kupljene prije neg bi škola počela i te su ti za godinu dan, drugi nema i ne će i bit. Edna maja, baba na žbice užoči od domaće vune. El maja, el vrag, a grebe se, ma niš je akupunktura i te gluposti, ali ki te pita, il to nosit, il gole guzice u školu. A kad snig zaluja i učvika se, unda je man tote nekakov stari kaputić, taj se ni kupoval, taj se dobival. Dobival se od koga starjega diteta iz grada, meni je moral bit dobar, ma kakova farba, pučaci, kroj, nato se ni gljedalo. I da, mogla je to bit i ženska kabaničica, niš ni smetalo, čak se ni pučaci nisu na drugu stranu preprišivali, ma joook. Na glavu jopet kapa, a Bože mili, isto od domaće vune. Da se ne kolje po vratu i po licu, natandrlji je na vrv glave, na vlasi gori i tako ajde kaj nakostrušeno pile. I na kraju rukavičice, borati, ni to svako dite imalo, ne. Te rukavičice je moja pokojna baba, tadaj je bila živa, plela isto od domaće vune na šapicu il capicu se to zvalo, kako ki. Svi prsti u rpu, samo posebno budi palac. Kaj čerapica.

I unda se na maloj placi u Otošcu pojavidu takove rukavice, ja kasan nji vidil, meni su man suze naoči trgle, a kako i nejdu kase sitih sukneni čerap, suknene maje, suknene kape i sukneni rukavičic kako se koljedu i bodedu. Ima li iča lipše od toga, a? Od moje suknene aknupunture?

I.B.

 

 
LJETO U HOTELU JEZERO
LiveCam Otočac
SenjskaBura.hr
GlasLike.hr