OTOČAC – Gotovo je, nema više zime, proliće je – i sve tako redon se narod nabacuje kako je zimi kraj. A el kraj il ni, vidiće se još. Evo jutroske, tako smo bili ponosni kasmo na radiju mogli čut da počimlje s Otošcon: Otočac -9, unda Gospić, pa Bednja i tako redon. Ako po ničemu, unda barem da smo po studeni prvi, jerbo darovanu konju (mrazu) ni ubrke pljuvat. Doduše, ima nas u javi i po dičjemu vrtliću, po bazenu i kojekakovin drugin prdačinami, a volika studen je kaj lipa prdačina, more bit.
Jopet, svi bunberadu o tomu globalnome zatepljenju, more bit da i je. Velidu da će se siću toga more dignut i sve potopit, pa sad ako do nas dojde, unda je vratar odnesal šalu. Al sad jopet velidu, da to rekla nekva profesorica negdi tamo bogu za leđima u Engleskoj, da ne glopalno zatepljenje, van da će bit maće ledeno doba. Eto ti ga vratre na, sadaj zatepljenje, sadaj ledeno doba. A kad je to pred ku godinicu vikal naš profesor Paar, unda su se svi isprđevali iž njega, da munjen, da niš ne zna. E sadaj kad je va Englezica to rekla, ča sadaj?
A ni nan svedno, u pitanju je el radijatore i peći bacat kroz puneštru ako je globalno zatepljenje, il duple zide zidat oko kuće ako će bit maće ledeno doba. Maće, od edno 70 godin, srićon ne će bit dugačko, el.
I.B.