OTOČAC - Na našoj pateki u Otošcu na vrati osvanula arta. A ča bi arta delala neg da na njoj nešto ne piše. I borami piše. Piše vako: da u isto vrime u pateku smidu uć dva pacijenta. Hm, dva!? Dva pacijenta!?
I sadaj kase čovik malo bolje razmisli u svojoj glavi, unda ispada vako: u pateku smidu uć dva pacijenta u isto vrime, dva po dva (kaj u Fatinon vicu). A unda to jopet znači da u pateku more uć cela tola ljudi ki nisu pacijenti. Borami znači, jerbo u pateku ne gredu samo pacijenti, već i zdrav narod. Neki kupuje nekve kremice, neki šanpon za šence (a imat šence ni bolest, el), neki da mu noge ne smrdidu (ni to ni bolest), neki kremicu za picajzle (ni to ni bolest), neki kupujedu vitamine, drugi minerale, svašta se u pateki našoj more kupit. I cela vrpa lopošćin, ke krstu treebadu i ke krstu netrebadu.
I tako, u našu pateku, baren po nomu ča piše na arti na vrati, smidu uć dva pacijenta i sav drugi narod odedanput. Jerbo se zabrana ne odnosi na zdrav svit, van samo na pacijente. Borami da.
I.B.