OTOČAC – Veli narod da i ni neka godina, i ni. Nešto se kaj uznendalo, nikako se leto otrsit, još vajk treba ložit oganj i dugačke rukave nosit. A morali bi padat kaj muve od vrućine, a ne padamo. Eto Petrove, samo ča ni.
Al zato ako nema vi muv (u glavi, tamo roidu li se roidu), ima na krunpiru muv. Zlatic ima. I ne svudaj, na neki grm napanedu, ma sve obrstišu, samo štabrljice ostašu,. A unda na dva-tri druga grma ni vražje. E sadaj, je za trovat, ni za trovat, krst ni pametan. Ako greš na špricu, to unda tira sve rede, i nunde kadi treba, i nunde kadi ne treba. I troši se otrov, skupo to kaj pateka, i truje se bez potribe.
I zato kad je vako, ima zlatice pa nema zlatice, najbolje je zet pantekana, š njin u čerapu i truj zlaticu. Jerbo čovik unda more potrusit pantekana nunde kadi ima zlatice, nunde kadi nema, samo preskoči. Ni stari narod bil munjen, ma kakov munjuen. Em je bil šparan, em je čuval zdravlje koliko je mogal.
I.B.