KONPOLJE – Eto letnje Stipanje, ta pada na 16. kolovoza, oće reć baš u nedilju. A to je edan dan kašnje Gospoje. Tako je to po „novomu“ kalendaru, inače je letnja Stipanja bila pok je svita i vika 20. kolovoza, odmaknuta od Gospoje, pa je unda to bil i velik zbor ne samo u Konoplju već i šire od toga. Dolazilo se ocvakudaj, iz Švice, Otošca, Brloga, ma ocvakudaj je narod dolazil na zbor. Čak je bilo i verovanje da taj letnji sveti Stipan pomaže nima ženami ke nisu mogle ostat u blaženomu stanju, pa je zabiliženo da su siću toga dolazile žene čak i iz Primorja vamo. Al to se zaboravilo. I da, oće se poistovetit vaj letnji sveti Stipan s nin zimskin, a nisu isto, vaj je sv. Stipan (kralj) Ugarski, a naj zimski je Prvomučenik, ma ča god o tomu ki rekal, al je tako.
E sadaj, u nedilju će bit zbor, biće maša u 10 uri. I na toj maši ćedu dica, nji petero, primit i prvu pričest. Al nakon maše ne će bit zbora, ne će bit veselice, ne da korona, već kase maša smiri aj svaki kući svojoj.
Al večeraske, u petak, će na vičernjici bit sakrament pomirenja, pa spovid za dicu ka ćedu se poričestit, pa za njeve ćaće i matere, pa za krsne kume (to sadaj popi izmišljadu i širidu te spovidi, negda tako ni bilo, borami ni), ali i za celi verni narod. Tako da lipo Stipanju dočekatu pripravni i čisti duš.
M.K.