Lika nekretnine

Znadu - na čemu Svit stoji, a neznadu potirat lisicu

Objavljeno: 20.09.2020

OTOČAC – Negda su babe vikale za noga ki puno zna da taj zna - na čemu Svit stoji, a to je tajna nad tajnama, jebo malo ki zna - na čemu Svit stoji. Unda su une od sprdnje zanle reć za noga komu frštunt ni jača strana da i taj zna - na čemu - Svit stoji. Nisu une bile, sve nepismene, munjene, ma kakov. E danaske se vrime prominilo pa mladi znadu - na čemu Svit stoji, a mi zerkicu starji, mi niš ne znamo, mi smo fort munjeni. To je tako, pa komu milo, a komu krivo.

Evo sadaj da vidimo taj mladi svit, kaj zna - na čemu Svit stoji, da rećemo lisica zaleti med kokoše il u kokošarnjak, kako bi je uni potirali. Kako bi vikali? I kad ji to pitaš bljedo te gljedadu konda ji pitaš koliko je Misec težak. Obazdiredu se oko sebe i mislidu „o Bože, kakovo mu je to sadaj pitanje?“. E, kako ćeš larmat na lisicu i spasit peteja i kokoše? Nigda čuli, a čoče znadu - na čemu Svit stoji.

A da znadu - na čemu Svit stoji, unda bi znali da kase lisica uprca med kokoše, da se iz svega grla mora larmat da uteče. Kako larmat? U tomu je kvaka! Mora se larmat: talija, talija, talija! I unda lisica uteče i kokoše su na broju. Al to mladi svit, kaj zna – na čemu Svit stoji, ne zna. Eto, pa da mu kažemo mi starji i munjeni.

I.B.

 

 
LJETO U HOTELU JEZERO
LiveCam Otočac
SenjskaBura.hr
GlasLike.hr