Lika nekretnine

Zovi vatrogasce ...

Objavljeno: 22.09.2020

OTOČAC – Ni vatrogascima lako, vratarnji je to posal. Kad gori, zlo i napako, vruće, bi krsta i oganj ćapil, glava je u pitanju. Al, eto, mora se, oganj gasi - brata spasi, velidu tako. Dobro, to je njev pravi posal, al imadu uni i posla kaj i je i ni posal od vatrogascov.

Rećemo, spenje se kakova moderna munjena mačkurina na vrv kakovoga stabla, pa mrnjavče i mrnjavče, ne more doli . Mačka? E, mačka. Zovi brže vatrogasce da skinedu mačku, i uni se jadni prtidu na stablo, pa po ograncima, mesto da ofrknedu kakov matrak na mačku i sve rešeno. Al, mac maco, da ji ki uslika i metne na fejz, eto ti man otkaz – zlostavljanje životinje. A ča se ta životinja, el mačka, sprtila gori pa ne zna doli, to ni zlostavljanje vatrogascov? Nema logike, al o čemu divanimo. Il se negdi zaglavil jež, leti po vatogasce da škapuladu ježa. I škapulavadu ga, ježa, čajdu.

Evo danaske, vrgli naši otočki vatrogasci svoju lemuzinu sa škalami pred gracke kuće. Na ednoj nešto tamo prkljadu oko barjakov. A barjak pod puneštron, pruži ruku van i skini ga, vrzi ga! Biće da je zadrglo pa se ne da – zovi vatrogasce. I uni, siroti, moradu zadrgli barjak skidat i mećat. Unda jopet, navalili „vrapci i komraci“, gradidu gnjazda po žljibima, kad jača kiša grune, preljiva se preko žljibi iz gracke većnice, začepilo gracku većnicu. More bit i lišća. Jopet zovi vatrogasce da čistidu žljibe.

I tako, njimi uvik neki smisli posla, ča treba i ča netreba.

I.B.

 

 
LJETO U HOTELU JEZERO
LiveCam Otočac
SenjskaBura.hr
GlasLike.hr