OTOČAC – Stisla studen, sinoćke je bilo fort zima, toplomjer je pokaževal ispod -8 gradi. Još je bila i mena, mladi misečić se kaj srpić iskeljil na nebu, pa je izgljedalo još studenije. I krst bi rekal da će do uitro bit minusov ivragu. Al ni tako bilo, po noći se okrenulo pa je jutroske bilo zerkicu teplije neg sinoćke.
Al je za večeraske reklo da će bij najstudenije, pritidu se da će bit i do -15 gradi. More bit, svega more bit. Ni to malo, al jopet ni ni prejako, pantimo i veću studen. A vi nekoliko dani ča je studenije, to se more i ne more zvat pravon čvikon. Jerbo kad je jaka čvika, unda je studeno i po noći i po danu, svaki dan jače i jače, da moraš mećat kakove klašnje i stare kabaničine svečera pod vrata da ne sviri studen u kuću. I unda kad je nastudenije, unda će – prepuknut. Tome se tako veli, narod ni metrološki bil pismen pa ne zna reć da će se teplija zračna masa pogurnut nu studeniju, da će Đenovska ciklona rinut Sibirsku anticiklonu, ma otkudaj bi to narodu, već je narod divanil da će – prepuknut. I sad treba čekat jutra da prepukne. Borami da. I oće.
I.B.