OTOČAC – Ni nekva teplina, ča je, je, ni za spremat zimsku robu u ormare i škrinje, loži se još vajk, eto, prošla je i sveta Sofija (na ča rakiju pije), minuli su i ti nekvi ledeni sveci (aj in pogodi imena!), mraza ni bilo, al kaj da smo zaboravili na Spasovu. A Spasova bila u četvrtak. I to je jako važno, ne samo siću Spasove, nego siću toga ča je stari narod vako rekal: - Spasova mora fažol zateć u zemlji. A ča to oće reć? Da treba pazit kad je Spasova (a una šeće, ni svake godine u isto vrime), da do toga vrimena more još šurnut mraz i pobrat fažol kaj je tekar nikal, pa čij si unda. Zato se veli da ga Spasova mora zateć u zemlji, el, da ni zemlje probil. Tako stari narod računal, u to veroval, i ni mu svaka bila munjena, ni.
Kako su minuli ti svi opasni sveci, eto prošla i Spasova, more se fažol sadit, i drugo ča u vrtu se more zabost. Srićon je na snagi to nekvo globalno zatepljenje, pa teplo o Bože. Ča bi tekar bilo da je na snagi globalno zalađenje?
M.K.