OTOČAC – Narod je već fort zaboravil, puno toga se prominilo, verovatno i siću toga ča je svit zatrovan, zatrovan ne samo otrovima već i vako, kako krst da kaže, zatrovan svin nin čin ne bi trebal jerbo je došal vrag na svit.
Starja se čeljad more sitit da kase sadil prisad da se moralo pazit na zelje. Em da ti ki iz prisadnjaka ne pofuče prisad i sebi posadi pa ti nemaš ča u zemlju zabost, em kasi ga posadil da ti ga buvač ne poi. Ako naprne buvač, un poi srce prisada i unda zelje ostane kilavo, tako babe vikale. A kad se otrsi i otme, malo poraste, eto ti unda gusenic. Mili Bože negda, ti gusenic je bilo svudaj, po zelju, po živicami, puzilo to po prelazima, po lesami, to je bilo more gusenic. A gusenice poišu lišće pa jopet od zelja niš, red se bilo klatit. A čin? Otrovon ne, ni ga ni bilo, ako je i bilo kašnje pantekana, bil skup. I unda se cela familija zaspuzi po zeljišću i u akciju, mlado i staro, prstiman gnajvit gusenice. I tako gnjavi se to, gnjavi, dok se taj dan ne pognjavidu sve. A prsti zeleni od ti zgnjavljeni gusenic, ma neda se to ni oprat kako spada. A i čaš i toliko prat kad je red jutra dan jopet u zeljišće i gnjavit gusenice.
Ovaj lipi šport se zaboravil, nestalalo gusenic. Velidu babe da siguro od vi otrovov ča se špricadu, more bit. A te gusenice su od beloga leptira, nema leptira, nema ni gusenic. I ve godine se pokazale, napale na zelje, kud je suša, tudaj i une. I sad se narod pita ča š njimi – gnjavit prstiman, eto ča.
M.K.