OTOČAC – Danaske sreda, pa unda i placa, kako bi sreda brez place i placa brez srede? Ma nikako. Je kaj da je nekvo proliće, ali borme jako krmeljivo, studeno i ledeno, samo ča za nokte ne zalazi.
A placu prekrli vi ča prodajedu rožice. Mili Bože, rožic kakove ti bog oće, sve se šareni i mami. Babe oblazidu al slabo kupujedu, kudaj ćedu k vratru š njimi? Još mrazi tučedu, oganj se u kući loži, a uni naprli s rožicami. Ako vako podura, a sva prilika da oće jerbo su Grgurevske kvatre ostavile suvo i burno, ne će bit vrime za zabost ku rožicu u vrtlac ni u svibnju, a kamoli u travnju. I svetoga Marka se valja sitit. A borme ne zaboravit ni na svetu Sofiju. Pa ti unda kupuj i sadi. I bacaj novce kaj u vetar, konda in je odobisti, el novcima.
Jopet ima i vi ki prodajedu paradajzele, paprike, zelje i sve to drugo voće i povrće. Ni to jutra ne bi dočekalo. Tako, sve mi se čini, da će placa danaske bit slaba.
I.B.