OTOČAC – Fala Gospodinu, čera je završila škola. Edna muka manje za đake, za učtelje, a borme i za ćaće i matere. Jerbo ni bilo lako smirit školsku godinu i završit razred s 5,000. Ako dite ne smiri razred s 5,000, konda ni ni smirilo, konda je, Bože nan prosti, propalo u školi. Drugo se ne računa, sve drugo osin 5,000 je niš koristi. Baren da tako piše na papiru kaj se zove svidožba.
E, brajne, kase sitimo kako je negda bilo!. Ma ki je računal na 5, ma ki je računal na 5,0, ma ki je računal na 5,000, još malo pa će se počet računat i na četire decimale, borami oće.
Negda je bilo bitno da đak ne propane, danaske je došlo vrime da dite ne smi propast razred. Jerbo ako ga učtelj sruši, eto ti tote man inšpekcij, kojekakovi kontrol, pedagogov, psihologov, ginekologov, česa li već ne, i udri po učtelju, pa se ti, učtelju moj, peri i izvlači. Niki ne pita zna li đak iča, van je vajk kriv učtelj da ga ni dobro naučil, da je zato plaćen, i sva teglija je na njemu..
I unda se učtelji smudrovali, a ni jin za zamirit, pa lipo dilidu ocene. Ča bi se uni parabočili s celin ministarstvon i inšekcijami, ča bi se pravdali s ćaćami i materami, vako lipo daš dobru ocenicu i – mirna Bosna (vraga je una mirna, al eto, tako se veli).
A jopet kase sitimo negda, negda se pitalo u velikin razredima po trist i kaj đak eli s pet prošlo tri il morda četira đaka. I od nji el morda bil edan, il niedan, kaj je imal sve petice, bilo je tote četvorak, doduše ni smilo bit trojak jerbo si odma imal vrlodobar uspjeh. A vidi sadaj, odlikašev kaj plive.
I sadaj kad je ministarstvo testiralo đake, vidilo se da je – car gol. Da te ocene toliko ne vredidu, da ti 5,000 nisu morda kaj negdašnje trojke. Većinon. Ča sadaj? Kase đak upiše u srednju školicu pa se ne pokaže da ni 5.000, jopet udri po učteljima da su dicu slabo učili. I krug je zatvoren, tako se veli. A ako se iz srednje školice upišedu na falkutete, pa bude štekalo, onda jopet prištrucaj – nevaljadu profesori. A namo je bilo milo ako je u svidožbi pisalo – 5,000. Komu korist?
I.B.