OTOČAC – Kad krst čita naše novine, pa jopet naše portale, dojde mu, Bože nan prosti i ne zamiri, da man zame štričić i da se obisi na prvu slivu. I da se reši svi muk kima se njemu priti. Pa moraš poludit od stra i od brige, sve nevalja, sve gore od gorega, te smo najgori u toj Evropi po vomu, pa po nomu, nema toga ča ne valja a da mi Rvatići nismo med prvima. A drugi su kaj bolji? Valjda esu. I unda kad neki ki je šal u taj „beli svit“ prodivani po duši kako je tamo negdi, pa ne teče baš med i mliko, nisu kobasice ploton upletene. A unda kad krst vidi strance ki su se naselili u Ravckoj i kad uni uvatidu falit život ode kod nas, unda se krst mora zapitat ki je tote munjen? Ni ki odlazidu il ni ki dolazidu?
Evo zamimo samo žmare, ili ocvirke, kako ji ki već zove. Te žmare il ocvirci su se topili od sala i morda zerkicu od slanine (slanina se sušila na podu) kad bi se prase pridavilo krajen jeseni i početkon zime. Del se metni u jelita, a uno zericu ča ostane, to se poi. Morda je baba znala vrć ča u ćup il tegln i zaljat mašćon za u leto, al to su bili retki peci. I nisu te žmare il ocvirci bili baš nešto za čim bi čovik poludil. Tako, poilo bi se. Da ne propane.
Unda, unda su dokturi vikali da to ne ist, ta to mrsno, da se ljudi jako od toga debelidu, pa da in se žile čepidu, pa da će ji kaplja strefit. I u žmare il ocvirke niki više ni ajal, makni se od toga ća. Fina gospoda u to nisu ni gljedala.
Sadaj čitamo da je kila žmar il ocvirkov došla na 411 kun kila. I nastala kuknjava, po žmarami il ocvircima se miri ta nekva inflacija. Pune novine i portali žmar ili ocvirkov, ajme kako ćemo živit bez žmar il ocvirkov, ki to more više kupit, i sve tako redon. Sadaj to kupujedu fina gospoda, na ka se do pred ku godinu toga grustila.
Konda se mora kupovat te žmare il ocvirke u pateki. Ne mora! Oće li narod preživit brez žmar il ocvirkov? Oće. Pa neka kupuje naj ki more, a naj ki ne more nek ne kupuje. Lipo je rekal stari narod, da prostite „ni guzici koliko zja, van koliko joj se da“.
Tote je sav odgovor. Borami je.
I.B.