OTOČAC – Velidu da je kriza, da je sve poskupilo, da je sve pateka, al junačko srce ne da mira. Red je kisat papriku, pa kuvat ajvare, pa peć pekmeze, pa cidit soke. Mora se! I kudaj god kreneš, sve smrdi po paprikami i ajvarima.
Evo, primerom braco, ajvari. Ki je prije za to zna? Niki. Pital ja svoju babu Lucku, Bog je pomiloval, za ajvar. A baba se uvatila križat livon i desnon, ne samo da to ni delala (a od česa?), neg nigda ni ni čula za ajvar. I eto, ča joj je falilo, sritna i vesela umrla i brez ajvara.
A sadaj, daj kupuj crljenu papriku rogu jerbo brez toga vratra ajvara nema. Skupa i va krmeljiva obična paprika, a roga, Bože nas sakloni, konda je ananas. A malo ki u svojoj bašći ima rogu, i ve godine suša ubila pa roge velike kaj – ferferon. Unda kase ta roga kupi, pa je čisti od košćic, pa je melji na flajšmašinu, ili, još gore, rickaj nožon na kockice. Pa unda tote treba kapule, pa partizane treba isto na kockice narizat, pa sve u kotal. Unda ki voli ljuto – ljute paprike. Treba i zericu cukra potrusit da manje grkne. Pa mišaj, pa pazi da ne zagori, ne oganj jako, samo dva matraka da pregaradu, pa kad je gotovo i proladise treba vrć u teglne i poklopit i š njimi u špajzu il konobu.
I unda, kasmo napravili taj ajvar, ta ne ćemo man napast na njega i poist ga, treba ga pričuvat, treba se pofalit kad nan u kuću dojde kakova kuma il druga (vidi kako san ja spekla ajvar, konda ga una samo pekla, a svi imali posla, od najmlajega do najstarijega, a namo – una spekla!), pa treba ga sačuvat kad nan ki dojde (a bolje da nan ne dojde), pa unda komu darovat kaj teglnčić (da se vidi kako mi nismo leni i kako volimo domaćinu), pa se unda u taj ajvar malo ki i pača. Ni gljedat u njega! A un stui, pa stui, po njemu pada prašina, pa se na ajvar i - zaboravi. Borami da, ako ni u frižideru il na stolu, niki ga se ni ne siti. I na proliće, a, Bože moj, po vrvu se uvati sve nešto zeleno, plis, pokvaril se, ki se više to subita ist, bi te matrun prekinul, red ga – bacit. Kadi si bil – nigdi, ča si delal – niš.
I tako to s našin ajvaron. Al mora se!
I.B.