OTOČAC – Do danaske bilo globalno zatepljenje, a borami od jutroske – globalno zalađenje. Fort zaladilo, smrklo se, neke je i prevarilo, izašli u grad u kratki rukavići, spopala ji drćavica, a uno treba kožnjak il kakov zobun. Ruknula bura, velidu da će na Jadranu bit – organske jačine. More bit i da oće. Jerbo kad vrime oće, unda oće, a kad ne će, unda ne će i ultin. Evo spominjedu da je u Sloveniji i snig pal, pritidu se i nami da će past. O Bože dragi, more ako ga je volja, ta nizbrdo mu je.
A dosadaj, suša kaj malo ke godine. Va da najgora. A ni, bilo je svakakovi godin i ranije samo ča mi lako zaboravljamo i sićujemo se noga ča nan je najbliže. I unda ruknula kiša, ni ni zericu počela padat, jopet kuknjava, pada kiša. Pa neka pada. Eto, saznali smo da je čera u Otošcu palo kaj deci manje od 50 litar po kvadratu. Lipo, borami je. Baren ćemo imat vode, u Otošcu skupe kaj Radenska, al ćemo je imat.
A negdi se već i s poplavami boridu, da to raste naoči gljede. Srićon kod nas ni tako, eto zaobašle su nas te nekve pijavice, krupa i sva zla, biće da nas zališuje Senjsko bilo i ča smo blizu mora pa se to zlo ne more razvit kaj u ravnoj Šlavoniji i Zagorju, tamo negdi, nek ji bude već ako mora bit.
I zato sadaj, lipo košaru drv u kuću, zaognjit peć i grijat se. Jesen je, ča bi mi tili?
I.B.