OTOČAC – Narod više u niš ne veruje, premudril narod, sprda se s kvatrami. A vi mlaji, un nigda nisu ni čuli za kvatre. A mi zerkicu starji, i ni još starji, mi znamo za kvatre. I znamo da je vrime u kvatrami svakakovo, ne veli se badave ki je ružan bože te slobodi, il ki je kaj akrp lip, da je – ružan kaj kvatre. Borami je tako bilo.
A Mijoljske kvatre su prošle, jerbo svi sveci nosidu kvatre na prsi, samo sveti Duv na leđi. I Mijoljske kvatre su minule, počele su na sv. Matu, i raskinule se u nedilju jutro. A mojoj konšiji, babi Franci, njoj su se kvatre vajk rastrgovale nakon osam dan, tekar u sredu jutro, tako je una verovala, i vikala da kakovo jutro osvane u sredu jutro, kase kvatre raskinedu, da će tako bit do drugi kvatar, oće reć do Božićnji. Ako je tomu tako, ne treba se lipomu nadat, biće kiše, borami oće. Teško da će tote i sv. Petka pomoć, i una zna bit napaka.
I unda kasu vakove kvatre bile, nema ni Mijoljskoga leta, prošlo u kiši. Il kako ga sadaj zovedu – bablje leto. A niki ga nigda tako ni zval. To valja koministi Mijoljskomu letu tako nadenuli samo da se sv. Mojovil ne spominje. Biće tako, borami oće.
I.B.