OTOČAC – Ja ne znan ča je to, narod naprl ribat zelje konda će Putin jutra pušćat atomsku bunbu. Pa da i pušći, konda će nas zelje spasit, borati! Evo u sredu, placa je bila tako-tako, al vi ča zelje prodajedu, naštivalo ji se tamo pred radijon da se promaknut ne moreš. I svi nudidu zelje, a narod gljeda, zavira, piplje glavice, da nisu šumarice, pa pita poč cena, a cena još malo kaj u pateki, pa bi kupili, pa ne bi kupili, svedno kupujedu. Vidi vatar od vratra kako kupuje pa gre i un. A vi ča prodajedu, imadu uni i nekve ribeže na motor, doli vržedu platičnu vrićetinu i začas uribljedu zelje. Nosi kući gotovo, ne treba ga čistit, ne treba ribat, sve gotovo i š njih u plastičnu kablicu, ne more se tome reć bačva, ma kakova bačva, zericu pognjavit, potrusit soli i eto ti.
E sadaj, kako je narod ispal iz vire Božje, zaboravil je da je ve nedilje Šimunska nedilja i da se zelje nikako ne smi ribat i u bačvu vrć. Jerbo to ni dobro, ako se zelje riblje u Šimunskoj nedilji, okrićaće se. Kad to mlajemu svitu rečeš, un te bljedo gljeda, niš ne razumi, konda mu na grčkome divaniš, i još na kraju reče: pa ča ako će se okrićat? O Bog te u šumu okrenul!, ako se zelje u bačvi, sadaj plastičnoj kablici, uvati okrićat, unda ti to znači da se pokvarilo, da je obagnjilo i da moreš man š njin kravami u napoj il kokošami na dvorišće bacit, ako i krave i kokoše budedu tile. Unda uni jopet bljedo se zgljedavadu i tako tome nema kraja.
A Šimunska je nedilja ve cele nedilje, pa ako zelje pojde po vratru i uvati se u bačvi okirćat, to je siću toga. Borami je. Sv. Šimun je kriv.
I.B.