Red je nadivat jelita

OTOČAC – Nismo još sve posle oko klanja domirili, ma kakov! Ostala su nam jelita za nadenut. Jerbo negda su jelita bila glavna rana od klanja pa do Božića, mrsil se brk š njimin. Ča se pečenoga na masti zericu mesa na dan klanja poilo, poilo se, nema više, jerbo od česa ćeš ku kobasičicu nadenut ako sve meso podreš? Drugo meso je u slamuri, to se ne pača, nemaš se čin omrsit van jeliton, jelita su baš nekako znala podurat do Badnjaka, a unda je bila pečenka za Božić i tako to.

A jelita, neki to zove i kulen, odnosno kulenje, da Šlavonci zato čujedu bi svi pomrli od smija. Jerbo njev je kulen i kulenova seka od čistoga mesa, od plećke, a naš kulen od – kukurznovog brašna. Je da se obadva nadivadu u debeli drob i danke, al tote svaka sličnost prestaje. Vidila žaba kadi se konj kuje pa i una dugla nogu, ovaj oće kulenje nadivat. Zato je morda bolje reć – jelito, tote nema nikve usporedbe s ničin.

A stvari stuidu vako: kase debeli drob opere i prefrkne, unda se tipsa u ledenoj vodi i kapuli kaj da kapula miris otegne, a potegne i ne potegne. Unda se drob premetne u mljaku vodu i još dobro opere da ne bi ostala ka mrvinja od noga ča je u njemu bilo, a bolje ne spominjat ča je u njemu bilo. Pa se jopet prefrkne, vanjska stana mora doć unutra.

E sadaj se u kutlu gradi za jelita. Kotal se vrže na šparket da se ocvirci od sala otkravidu i ugrijedu. Kasu se ugrijali unda se meće dost kukurznova brašna posebno mlivenoga za jelita, taj dojde kaj malkice krupniji od noga od palente, jerbo ako je brašno premeko, ne bude to nako kako treba. Brašno se propušći kroz reje sitašce. I unda se po brašnu ljiva uvaćena krvušćina iz ćupa, baci soli, more i trun papra ako se ima, a nema se, i sve se to rukon unda lipo izmiša. Bude gusto pa se još ulje teple vode da bude reje, ne smi bit preretko, a ne smi bit ni gusto kaj palenta.

Kad je gotovo, s kotlon na stol i nadiva se u drobe. Planinka zame drob, utakne palčinu i dva prsta i napravi kaj škulju u drobu, to livon rukon, a desnom zimlje iz kotla i meće. I unda drob drmka da propane doli. Ako je drob jako nafrapan, unda se pomaže drugon rukon i stiska ga da propane u ne frape, pa jopet trpa dok ni dost. Drob ne smi bit do vrva napunjen, mora ostat malko prazniji jerbo bi rado pukal kase obaruje pa ode mast upropast. Napuni se nekoliko drobov i pometne s kraja i unda se tekar vežedu. Vežese se svaki drob pri vrvu oba kraja ednih koncen čvrsto, ma dretvon, da ne popušći. Pa se u teploj vodi nadenuta jelita operedu i vržedu u kablicu do obarevanja. Na kraju ostane samo brašno, morda i kaj ocvirak, to se na kraju nadene u danku (to je slipo čerivo) i to jelito je za nako, komu dat ako se baš mora.

E kad su jelita nadivena, a po presetu ji bude po dvanajst, unda ji je red obarevat jebo bi se krvušćina pokvarila i unda ji mores paščetu bacit, ako bi i ono tilo ponjušit. U kotal se nadre vode i vrže da se ugrije. Kase voda uvati mišat, vrime je da se unutra vrže jelitov koliko ji more po vrvu plivat. A ako je voda prokuželjala, ulje se lončić vode da voda premre. Ne smi se jako oganj jarit, nako istija se mora. A da ne bi jelita pukla jerbo se brašno nadme, žbicon se na nekoliko mesti jelito ubode da pušći mrs i zrak. I tako se drži u toj obarnici morada i po pol ure, i vadi se van, a u istu obarnicu se mećedu druga jelita i sve tako dok ne bude gotovo. Moglo se odedanput jelita obarit, a često puti bi se i dvaput obarevala pa su se nakon toga mogla i friška ist, ni ji trebalo ponovo kuvat ili propicat. Kasu jelita dobro obarena, una poškuridu i upotidu se od mrsa, to je znak da su dobro obarena. Kase proladidu š njimi na šćap i na pod na dim.

Eto, tako je to bilo s jelitima, negda. Sadaj se u jelita (nisu to više jelita) meće i kuvana žigerica, kožice, glavina, svašta se meće, a nadivadu se i jelita brez krvi, da su s krvi fuj. O fini guzic! Pa ji zovedu švargli, pa krvavice, svakako in imena nadivadu, a morda i bolje jerbo jelito je jelito, a ovo drugo su sve drugo samo ne to.

I.B.