OTOČAC – Svi nekako rado divanimo i rado se sićujemo kako je to negda za Božić bili kasmo još bili dica, kako smo se svemu radovali, kako smo edva čekali da mat ili baba speče kakov keksić ili kolač, kako je sve to lipo danulo, kako je ovo i ono. More bit ča nan je to bilo u mladosti pa je sve tadaj bilo lipo, a kad krst dojde u starost, a ča mu more bit lipo?
Evo još ednoga staroga recepta o finin kulutanima.
Treba izmišat 18 dkg cukra, 12 dkg maslanca i žlicu kisele vrhnje ili jorguta. Kad postane pinasto umišat 40 dkg brašna i po volji dodat malo vanilij cukra ili korice od lemuncina. Zamišeno testo treba ostavit da stoji najmanje pol ure pa ga unda rastakat takačicon. Unda ji limicon treba izriževat, ako nema limice more i žmuljon i napršnjakon. Najprvo se žmuljon, najbolje vinenskin, odriže testo, a unda u sredini žmuljon od rakije napravi škulja. Borami da. I kasu kolutani narizani, š njimi u pomršen bratvan i u trunbu. Ne smi se pušćat da ji oganj jako ćapi, lako pomrkidu i izgorisu. Kasu lipo rumeni, nako kaj na suncu pečeni, unda još teple treba uvaljat u sitni cukar. A ki oće more pravit edne kolutane ćorave, a druge s tri škulje, une se izrižedu napršnjakon, pa se namaže naj ćoravi slivovin pekmezon i naj sa škuljami poklopi po pekmezu. Ti su lipši i štimaniji.
Vakovi kolutani moredu podurat ako ji dičurina man ne poderedu, borami je tako.
I.B.