OTOČAC – Eto, projde Majka Božja Kandelora, projde i sveti Blaž, svi projdešu, al zima osta, opatrnula studen. I imaše sveti Blaž pravo, Majka Božja Kandelora reče da pol zime fora, a njoj sveti Blaž: - Gospe, to je laž! I koliko god ni baš, eto, tako zgodno reć Majki Božjoj da laže, al sveti Blaž se subital i bil je u pravu. Jerbo je ipak na Svićnicu bilo lipo, a kad je lipo, unda je stari narod veroval da će se još nazimovat i načekat prolića. I pogodil, stari narod, ni mu ni va munjena, naučilo njega i brez metrologov, bez Picekov i Sjerkovićev. Borami je. Jerbo to je veljača, pa unda tekar ožujak, a i ožujak zna ožuljit, veli nami baba Ivanjica. Stislo zericu studeni, a velidu da će još i više. Pa kad krst čuje po tim Amerikami kako je zima, pa po toj Kini, Rusiju ne smimo ni spominjat, el, a tekar Japan, unda dobro i prolazimo. Valjda zato ča smo jako veran narod ki se Bogu moli, osobito neki, ki danjivadu i noćivadu u crikvi, kima su kolena modra od klječanja, pa nas ti zališidu kod Boga.
I još nešto nan je ve godine promaklo, u Ameriki, a kadi će neg u Ameriki, uni prognozu deladu ne po Majki Božjoj Kandelori, tamo se to ne smi, van po nekvom sviscu Philu. I ve godine toga Phila niki ne spominje, a u novinami ispalo da uni, el ti Merikanci, išli po Phila, a Phil otegal tabane. Krepal u svojoj jazbini. Čaš sad, majke ti Janje? Unda uni trk tražit drugoga svisca, ma ki mu ime more zapametit, jadnoga iz sna probudili, un još nako bunovan, i da je taj novi vidil svoju sinju, a to unda njimi znači da zimi ni kraj, da je tekar na polovici.
Eto, tako gatamo mi po Majki Božjoj Kandelori, a Merikanci po svoimi svisciman.
I.B.
Foto: Z. Tonković