OTOČAC – Loži baba kozu konda je spramoglava, oš u kući puknut od vrućine. – O, baba, pa ča tako ajcaš, eto se koza zasijala, oće se raspast? Večeraske će bit prvi dan prolića, a ti konda smo u sred zime. – E, lipoga li prolića, nemaš ča, lipo, teplo, ma milina – gurka baba ževarku popečkon da bolje gori. – Zima je pasala, a ti konda će Fajbanova, trebalo bi već prestat i ložit... – Kad je tomu tako, a ča ste se unda tako obukli? Da vas raspravit, bi obukal još troje ljudi – ne da se baba. – Al, znaš, baba, mi se moramo brinut o prirodi, moramo pazit da previš Kuglu zemaljsku ne grijemo, jerbo to pelje u globalno zatupljenje, pa ako se Kugla previš zavruća, odnešće nas vrag... – Vako i nako, odnešće nas, i s tin tvojin zatopljenjen i brez zatupljenja. I ča ti misliš da san ja moguća to spačit, a? Konda nas ki pita oće li se Kugla ugrijat il ne će. – Kako ne, ako ne ložimo furunu, nema tepline, nema dima, a sve to zagrijava. – Unda, izajdi ti van pa se ladi, a mene pušći na mir... Un i njegov prvi dan prolića! Hm!
I eto toga prvoga dana prolića, računa se kaj od jutra, al učene glave velidu da će nan doć (valjda će proć i našin sokaton, trebalo bi izać preda njega, borami bi), da će nan doć večeraske oko 10 uri. I eto, dan i noć bijdu nan ednaki, a svakin danon dan sve duglji, a noć sve kraća.
I dok mi tako dumamo kako proliće, ča š njin, koliko se grijat, sve kaj zima ni bila jaka, al je drv sjareno da krst ne more poverovat uč i kako, naša baba vrgla ćali na oči, edna ruča in je otpala, al una svezala z dretvon pa dretvu oko glave i gljeda u kolendar. I naglas razmišlja. – Aha, borami eto i Blagovisti... u subotu su. A Blagovisti – pripovisti, vikala je moja pokojna baba Franca... A za Blagovisti ni se badave divanilo da će bit trojega mesa ... –O, baba, ti bi trojega mesa?!? – Ma odi k vratru, ne bi ja niš, tako se veli... Da će na Blagovisti bit trojega mesa, edno da se goveče uštrkljalo jerbo su napale muve i abdi pa prebilo nogu, drugo da je ubil led, a treče goveče da je zmija uila. – I ča, kako trojega mesa? – Eto, tako, kako si čul. El ti sve moran naslikat, a? To ti divani da je na Blagovisti svakakovo vrime, da se minja iz ure u uru, od sunca i teplino do sniga i studeni, to ti je – trojega mesa.
Dobro, nismo baš sve razumili, al ki će babu Katicu u svemu i razumit, zamuči pa si se rešil nadimanja.
Prvi dan prolića, Blagovisti – pripovisti, trojega mesa ... O ča nas još sve ne će snać?
I.B.