El drenjulova, el maslinova grana?

OTOČAC – Eto nan i Cvetnice il Cvitnice, već kako ki reče. A na Cvetnicu se u crikvi na blagoslov nosidu grane. Ve srede bila puna mala placa maslinovi gran, kupuje se to naveliko, neki grančurinu, a neki grančicu kaj za blagoslov kuć, kako ki. Jerbo kako se na maši pojavit brez malsinove grančice? To nan dojde kaj neki novi standard, ni donest bilo kakovu granu, a jok, van – maslinovu. Bože nan prosti i ne zamiri, konda su Isusa u Jeruzalemu dočekali maslinovin granami, nisu, van palminin granami. Srićon se ni niki sitil da donese prodavat palmine grane, bi se potukli za nje.

Al naša baba Ivanjica se ne da smest, una vajk goni po svomu, drži se starine. ni čut za maslinovu grančicu! Šeće una već danima po Jezerinami i traži. – O, baba, ča tražiš? – Ča te brige! – milo una nami odgovara. Aj, red pušćat babu na miru i nako oko bacit ča to una traži. A baba od voga grma, pa k nomu, sve zaviljašila glavu u zrak i zvirnja. Pa šljukon zapne granu i privuče k sebi. Aha, dovrgli smo se pameti, baba oće na Cvitnicu donest granu od drenjule. al drenjule rano procvetale pa se cvet oklatil, i nisu više nešto. Unda jopet baba zavira oko ciburak, procvetale, eno se sve zabelilo. Al visoko je, edva baba more dovatit, trebale bi i škale da se sprpnja, još se more omaknut i na zemlju zveknut, ča prebit, pa eto ti babe i njezini gran, sprest kudilju preko reda.

Pušćali mi babu Ivanjicu na mir, nek dela ča oće, staro čeljade, stare navade, ni una za maslinove i palmine grane, njoj treba bršljana i tako toga, već će una nešto naš i sabrat. Kad eto ti babe u kuću i nosi puketić ljubic. Mi se zgljedali, zinuli kaj pećina, baba se čudi čemu se mi čudimo. – I, ča bleite u me? Iman li morda roge na glavi? – prekida una tu napetu šutnju. – El te ki vidil da si nabrala te ljubice? – Ča ja znan el il ni, brige me – otresito una. – Ali, baba, ako te ki prijavi, platićeš Rvackin šumami kaznu da nan pol teleta ne će bit dost. – Ma ča ću platiti? Nisan ja to nabrala u šumi, van u Jezerinami, na livadi, i ča unda te Rvacke šume imdu s manon, a? – Al to se ne smi ... – Ma ča se ne smi? – Pa brat ljubice, to zaštićeno, čuva se priroda ... – sve mi njoj tako nabrajamo. – Brala san i braću! Oduvik je to tako bilo i biće. Jerbo kase najde lipa drenjulova grana, pa se oplete s zelenin bršljanon, pa se po tome lipo privežedu ljubice, to ti je bilo za k crikvi ponest i blagoslovit ... – uvatila babu sićanja iz mladosti, brige nju za prirodu i kazne. Žive una svoj život i ima pravo.

I.B.