Čerišnje i jagode ne dadu k sebi

OTOČAC – Placa je, sreda je, vrime tako-tako, oće škronut – ne će škronut. I ča će narod neg na placu, više niki ne sije ča svoje, svi dojdedu na placu pa kupujedu paradajzele, papriku, rano zelje, ma ima svačesa. A rožic, već od šarenila ne moreš proć ulicon jerbo oči zanaša. Kakovoga ti duša oće, oš za van, oš za na puneštru, oš za u kuću, samo novac da je.

A unda ni ki su prošli sred kupili paradajzele, izgljeda da su se prevarili. Nisu ga ni u zemlju zaboli, kad već drugi dan mu žuti lišće i frče se. Ča bi rekla naša baba Maša da ga uvatila plemenjača. Ne baba plemenjača, van plamenjača, a una da isti vratar. ma dobro i veli. Red je zet špicu i udri po paradajzelima, a tek posađeni. Bog ti boga ubil, a ča će unda bit kašnje jerbo va kiša ne misli stat, a kad je kišno i teplo, eto ti man plemenjače. Naprnula i na ljutiku i na kapulu, red i nju pošpricat, pa sadaj ti i zdravu ranu. Tako kod kuće, u vrtu, a ča se unda dela tekar s nin ko se na placi prodaje za ilo?

Ima danaske i čerišanj i jagod. Sve narod šeće, zagljeda, rado bi zel ku čerišnjicu il jagodicu, al to skupo kaj pateka. Va ča prodaje veli: - Zamte, gospe, zamte, vite kako su lipe. A edna žena joj odgovara: - Ma esu, esu, da od padavice ličidu, preskupe su. To je tako, ki ima loja taj i nešto iza sebe maže, a ki nema taj ne more ni fažol zasmrdit. Tako je i s jagodami i čerišnjami. Bež nji kaj i š njimi.

I.B.