Žito žela, žito žela ...

OTOČAC – Sadaj, u va nova vrimena, nazoveš mobitelon, il svrneš čovika s konbajon na njivu i nek vrši. A ti se lipo odmakneš da ne praši ute i gljedaš prekriženi ruk. Naša baba Mice ne more ni dan danaske verovat da to more tako. I ako je njiva blizo kuće, konbaj ti doveze žito u dvorišće i istrese.

I unda nami naša baba Mice uvati pripovidat kako je to negda bilo, kako je to bilo u njezinoj mladosti, dok je una curovala. Žita se sijalo dost, a od česa ćeš se prekrmit ako neš posijat, požet i ovršit? Sijal se jačmen, sijala se šenica brka, pa neki je sijal i pir ili raž i zob.

Za žetvu je žito dolazilo edno za drugin. Najprvo je dolazil jačmen, njega se moglo žet već krajen lipnja jerbo bi sazrijal najprvo, pa se žela šenica, za njon pir i raž, a zob najzadnja. A jačmen budi maći, ako se žel, unda se srpon želo pri samoj zemlji jerbo ne moreš snopa napravit, kratka slama. Najčešće se jačmen znal pokosit koson kaj trava, pa ga lipo spravi, zdeni na njivi i neka čeka vršidbu. Ki je imal mesta na guvnu, zdeni ga tamo da čeka vršidbu.

Unda je na red dolazila šenica, imala je visoku slamu pa se žela na strniku. Jerbo ako je ne bi krst žel na strniku, to bi snoplje bilo bože slobodi veliko, sama slama, treba ovršit praznu slamu. A žele su ga žetalice, najviš ženske, od cur, žen do stari bab, sve su žele. Ki je imal više, i muški su želi, srp u ruke i kolji. A želo se po prežanjkami, zami se preko njive edna prežanjkica, ni prevelika ni premalena, da se puno ne mora šećat i žanji. Kad požanji, unda ajd na novu prežanjku. Lipo bi se livon rukon vatala rukovet, a desnon srpon žela. Srp je vajk moral bit nakošen prema zemlji da se žetalica ne bi porizala, jerbo ako se poriži, to peklo kaj sam vratar. Vatalo se i želo toliko rukoveti koliko se u ruki moglo držat, kad je dost, metne se na strniku i tako slaže dok ne bi bilo za edan snop. Unda se žanje za drugi snop, sve dok se ne požanje.

I požeto žito tako stoji na strniki da ga još sunce dobro blazne pa se na kraju gre vezat. Lipo se srpon odriže rukovet šenice pri zemlji, podili napol, pa se unda u klasu zasuče uže, metne na strniku, srpon se zame požeto i vrže na uže. Uže se stegne, ako je snop veći i kolenon se prikljekne i pritisne, i zavinta i snop je gotov. Obično ga se postava, da je snopu guzica, da prostite, prema tlu, a klasje gori.

Ako se sprema vrime, unda se snoplje brzo snaša u vrpu, ne nosi se tote snopić po snopić, dva snopa pod svaku ruku, a po dva uvaćena za uža u svakoj ruki, to je, ako nas račun ne izdaje, osam snopov man. Dica, el, una nosidu manje snoplja, al nosidu. Unda neki starji slaže kladnju. Lipo se uduguljasto meće snoplje s klasom prema unutra, guzica van, i zdiva slično kaj na kolima, se dok se ne dojde kaj pri kraju. Tote se unda po sredini metne snop do snopa po dugljinji, to mu dojde kaj graja na krovu, a upapriko se slaže snop do snopa (to mu dojde kaj rožnici na krovu) al da klasje visi prema van. Napravi se tako kaj krović. I još po vrvu se poreda po dužini snop do snopa, kaj klobuci na krovu kuće. I more kiša lemešat, ne će zamočit. A kadaj tršatuna projde, il je ni ne bude, drugi dan se kladnja razvaljuje i snoplje raznaša uokolo da se suši.

Neki je snoplje svažal man kući na guvno, zakoplji stožinu i zdivaj. Zdivalo ga se uobal ako je suvo, a ako je  mokrije, unda se križalo, al tadaj manje ga stane na stožinu. A ako ga je bilo manje, unda uz kraj njive zabi kolce i zdivaj na te kolce. Nisu bilo visoki, edva dva metera, da se more iz zemlje do vrva dovatit.

E sadaj, želo se man čin rosa pojde, ako je bilo rose. Žene se skini u košulju, na noge obuj suknene čerape jerbo izbodešu noge na strniku. Osobito su cure pazile da se nagrdidu noge jer kakojdu na zbor takove poć? Rubac na glavu. A kadaj pripeče u podne, unda rubac razveži i pušći rogljiće da visidu, neka bi žena znala i zabacit rogljiće od rubca na time. A cure, moda je bila da ne valja pocrnit kaj tava, pa bi rubac namulile kaj bule da in se lica ni ne vidi, samo da ne bi pocrnile jerbo kakojdu na zbor tako. A muški, uni se skalaj u gaće i košulju i žanji.

Velika je pripovitka o žetvi pri misečini, veća je pripovitka neg je to bilo. Trebalo se puno toga ugodat da bi se moglo žet po noći. Je da je bilo lakše, ledenije je, sunce ne peče, al ako se krst izmrče žetvon po danu, e pa ni mu do žetve još i po noći. Al pripovitka je ostala, ostala je pripovitka da se pivalo dok se po misečini želo, reje je to bilo, al eto, o tome se voli pripovidat.

A žito se moglo i kukat, na kosu se pri doljnjen recelju sveže sćap i na vrvu se špagon priveže pri peti kose, nategne se. Kako se taj šćap savije, to se unda zvala kuka. I kako kosac zamane koson, tako na kuka ne da da se žito rasipuje, već se lipo slaže u red na drugu stranu, još se koson malo nakrene da lipše pada. A za koscen letidu ženske, srpon ćapadu pokošeno žito, gradidu uža i vežedu snoplje. Ki je imal manje žita, retko bi kukal, želo se sve srpon.

O vršidbi drugon prilikon.

I.B.