Borme se sveti Ilija sinoćke pokaza ki je i ča je

OTOČAC – Lako se dučit i silon prdit dok ni više sile, a kad dojde viša sila, bome ruke same letidu na križanje i gubičine mrmljadu: Bože spasi! Unda se tekar Boga sitimo, a vako da ča će nan Bog, da ča un more, pa jopet velidu da je, Bože nan prosti, Bog i umrl. Bog umrl? Kako Bog more umrit? Da tako neki fizolofi velidu.

Neka, neka, daće un nami po repu. Eto, rećemo sinoćke, negdi iza polnoći, poslati ti un, el Bog, svetoga Iliju, taman nastupila Ilinja, da se malo provuče nebon u svojoj kočiji. I drndalo to po vražju, sve se kuće tresle kako je sveti Ilija šeštrokal svojon kočijon. A žiške ispod konjski ploč su edne mere sivale da nisi bil mogući u škurinu pogledat da ti oči ne zasinja. I kiša je padala, mrvinju je i krupe bilo, jopet sveti Ilija ni til da nas do kraja šundra kaj Zagreb i tamo Šlavoniju. Dobro smo prošli.

I zato danaske na kolena i zafaljevat svetomu Iliji. Jerbo su ognjeni dani, tri dana, jutra je sv. Dana ( Danijel ), a prekjutra Marija Ognjena. Negda je narod bil bogobojazan, držal se reda, a danaske se narod sobistil pa samo ča misec i zvezde ne laje. Eto mu na! Nek laje sadaj.

I.B.