Prvi rvacki festival sida

OTOČAC – Došli mi kući, ma ne moremo peko slanjke preć. Konda smo bili u rudniku, a ne u šetnji. Nožurine kaj bati, natekle, srce se uzlafalo, natučci na tabanima, nema duška pa to ti je. Edva se sklopotat ki na fotelju ki na kauč, sve četire ispod sebe. Gljeda nas baba Fila preko ćali, gljeda i muči. Mi tote tražimo Brufene, Voltarene, ma daj bilo kakovu pirulu da se ždrkne pa makon man pocrkali. Jopet gljeda baba u nas i križa se, čudi se. Borme prodivani: - E kadi ste vi u vratru bili? – Ma pušći, baba, ni do divana. – Ča vas je to tako satrlo, ča ste delali? Kunpir brali? – jopet će una. – Nismo niš delali, kakv krunpir – otpuvljujemo i edva odgovaramo, ličimo samo vodu. – Ako niste niš delali, a od česa ste se tako zarišćili i uzlafali, a? – Bili smo u šetnji, pušći nas na mir. – U šetnji?! Pa tako? ... Kakova je to vratarnja šetnja? – ne prestaje baba Fila. - El vas tiralo, a? – Ma bili smo na festivalu šećanja, eto, tote smo bili. – Na čemu? – smuli una rubac s livoga uva da bolje kaj čuje. – Pa rekli smo ti, na festivalu šećanja. – Valjda i to ima? – čudi se una. – Ima, ima, kako ne.

Niš babi Fili ni bistro, vidi se po njoj da ni. – Pa koliko ste unda vi to šećali? – Edno deset kilometeri. – Deset kilometeri? – E.  – I tako se satrli? Za deset kolometeri, a srce van vaše, ja bi vako stara sad preko Vrbovic pukla u Dabar i nazad, a vi se stukli na deset kilometeri. Tote podbili tabane, zaili se med nogami, oće van duša na nos izać. Pa kudaj vas vratar nosi kad niste kapac? – dignu se baba i ode po svoj mobitel. Zove.

– Alo Mica, esi tvoji bili na tomu nekvomu festivalu šećanja kaj moji? ... – A nisu, viš pametan narod, brez veze šeće naj ki pameti nema. ... E, e, to san i ja rekla. ... Mica, znaš ča, ajmo ja i ti osnovat kakov festival sida. Ča veliš, a? ... Ma e, to bi više pasalo vimi moimi, a i tvoimi koliko se ja razumim ne bi bilo zgorega. Osnujemo mi lipo festival sida, da vidiš koliko ćemo imat naroda, bićemo nas dvi glavne. I na televizoru ćemo osvanut, borami oćemo. ... Dojdi ti k meni na kafu da dogovorimo sve oko Prvoga rvackoga festivala sida. Dodji, dojdi. – Baba, esi ti pomunjenila? – Ja? – E, ti. – Nisan. Aj ti meni reci kako ta vaša klatnja more bit festival, a?

Jerbo koliko se ja razumin u festivale, festival ti je uno kad piva Ivo Robić, Rajka Vali, Zdenka Vučković, Marko Novosel i takovi. E i vi svašta festivalon zovete. – Takova su ti sadaj vrimena, moja baba, čaš.

Al baba ne sluša, zažmirila na edno oko, a drugo upiljila u višak, negdi u plafon pa divani kaj sama za se: - E kase sitin Maruške Kalođere, kako je una lipo pivala. Pa baba popivkuje - Ča je bilo, tega više ni / ča smo bili, sad su drugi to / nima više oni lipi sni / razbili se u komada sto. ... To su ti bila vrimena, to su ti bili festivali, a ne ovo sadaj svaki vratar oće bit festival.

I dok mi ličimo žulje i mažemo se mašćon izmed nog jerbo smo se zaili, baba Fila i Mica smišljadu Prvi rvacki festival sida. Da vidimo i to čudo, morda i upali.

I.B.