Kad baba Franca nakoli sliv

OTOČAC – Ima nešto sliv, neki veli da su rodile kaj kiša, drugi velidu da ji ima kaj krljak za poist, za knedlne utakat, a treći da morda bude dost i za pekmez speć. I pravo narod veli, pušćimo mi dućane, pekmez postal skup, a ča ti je teglnić pekmeza? Ma niš! Edne palačinke iveć grebeš po dnu. E zato kase speče svoga pekmeza, taj more podurat. I ne treba ga platit, dobro, mora se kupit cukra, al jopet jopet.

Mi smo ve godine pekli pekmez. Srićon imamo babu Francu, da ni nje, ma niš od pekmeza. Još sliv natrest, kako-tako, al iskolit ji, to se malokomu da. Snaja ne će ni da čuje, da sve palce ispara košćicami, da joj prsti pocrnidu pa da od špota i sramote ne more u grad med žene. A još kase tomu dodadu umjetni nokti, eto ti ga vratre na, bil bi to pekmez s noktima. Zato je naša baba Franca specijalist za kolit slive. – Oš, baba, kolit slive? – Da ča ću! Konda oblake svijan pa neman vrimena.

I gre to njoj od noktov, ne bi krst veroval. Jerbo naša baba ima nokturine kaj beloglavi sup, kad una zame nu slivu, pa zakoplje nokte u nju, man košćica štrkne do plafona. Ti njezini nokti kaj skalpeli, Bože nan prosti i ne zamiri. A kako joj to brzo gre, ne bi krst veroval.

A koliko su babini nokti na ceni, nek posvidoči bolnica. Dospila baba u bolnicu, nekakov je jemun spopal, pa oće umrit – ne će umrit, ma vratra će una umrit. I kasu dokturi vidili babine nokte, osobito na palciman, cel konzilij je došal gljedat u nje. Nisu se mogli načudit da baba ima tako jake nokturine. Debele, da te š njimi privati, bi krsta i zaklala š njimi, moga mi boga bi. I tako dokturi nešto šapljidu, pogljedavadu se i kad edan raspali: - Baba, bil ti kod nas delala? – E ča bi ja kod vas delala? Ja san stara za aborte prat i pode trt. – Ma ne to! – Van da ča? – zbunjena baba. – Ma mi bi tebi ponudili nešto drugo, gospocki posal. – Gospocki posal?! Nemojte se vi iz mene sprdat, znaš! – Jok, jok, mi ti tebi ponudili da greš s nami na aperaciju ... – Ne ću ja na nikakovu aperaciju, ako san se zaneredila ki put i uteklo mi, to ni za aperaciju. Toliko znan. – Nismo tako mislili ... – Da kako ste to vi mislili, baš me zanima? – Ti, baba, imaš nokturine kaj malo ki... – E, ča mojin noktima fali.? – Ne fali, ne fali, mi bi tebe peljali u apreracijsku salu pa bi ti tin noktima prorizala kožu od noga ča ga aperiramo, mi bi rekli ča i kako, pa bi unda prorizala mrenu, pa odrizala tin nkturinami ča treba već odrizat ... – Znaš ča, ti baleša – otpili una dokturu – odi ti svojoj kući pa svoju mater ... (ne smimo ni reć ča). I baba iz bolnice man kući.

Eto, sadaj su babini nokti duše dali za slive. Sve prirodno, slive prirodne, baba prirodna, babini nokti prirodi, pekmez prirodan, tehnologija prirodna, kemije nama, pa ki ne bi nakon svega il pekmeza. El de da bi?

I.B.