Nema pladnja – jada se baba Jela

OTOČAC – Vrime za klanje – veli naša baba Jela. – Zastudilo, nema muv, prosta noga, ni rano ni kasno, baš vrime od klanja.– Je, baba, je, samo ča zaklat? – E, došal vrag na svit, nemaš ča ni zaklat. A kako se negda lipo klalo, moj Bože, pa slušalo koliko puti se krivi, pa el se debelo il tanko krivi, sve si znal ča je ki zaklal. ... Bože mi prosti, a sadaj, konda smo zadnji u selu, konda smo ljuta sirotinja. C, c, c, c, c, nač je kuća došala! – cmekće baba. – Dok san ja bila gazdarica, dok san se ja pitala, e borami ni bilo tako. Klalo se! Po dvi koćene prasičine se klalo. A!, mesa kaj drv, a tekar slanine, na pedalj debele. ... A vidi sadaj! A, aaaaa! Nemaš čin ni drob pomrsit, e. Eto, dokljen nas je to vaše dopeljalo – klima baba glavon i pogleda ispod oka, a snaja ni uvon da mrdne, ni ne čuje, koplje po mobitelu, brige nju za klanje i za babino mrnjganje.

-A jopet kase sitin, kako je to bilo lipo kati ki pladanj pošalji. Lipo ti dite donesi pladanj, u njemu nekoliko komadi mesa, komad žigeričine crne, a sve pokriveno mrenon od droba. Unda man to u padelu i peci, da se krst omrsi ki ni klal. Pa kad zakolji, unda lipo vraći nazad pladanj, ni se moralo, al bil je red, da pokažeš da nisi puka sirotinja. Jerbo sitorinja ni niš klala pa ni mogla ni pladanj poslat, e.

-A čaš, moja baba, ta vratarnja parščja kuga pa se smidu prasci držat – kaj peremo se mi. – Eee, a vami teško palo, vidin ja, eto se poište od škrbi. Osobito na – pokažuje baba Jela na snaju – bi joj papci nacrljenjeni otpali, e.

- Kupićemo – za vratra ja reče.

- A kupićete? Čajte kupit? Pladanj? Pladanj će te kupit!? E moj sinko, to se ne more kupit ni da oš. Pladanj je bil pladanj, taj se ne more kupit, ničin.

I.B.