Sveti Nikola ulicami grada

OTOČAC – Negda je sveti Nikola bil sveti Nikola, a danaske su od svetoga Nikole napravili čudo. Te sveti Nikola leti zrakon, te sveti Nikola skače padobranon, te sveti Nikola izranja u podmornici, te se sveti Nikola vozi na motoru od 50 iljad eurov, došal taj sveti Nikola kaj, Bože nan prosti, kaj taj nekav Spajderman. Ne treba se čudit ako ki svetoga Nikolu vidi na rolami il na letričnon romobilu, more svačesa bit.

Al ima i pravi sveti Nikolov. Jerbo sveti Nikola, dok je šećal po voj zemlji, a bilo to ki zna kadaj, ni znal ni za vrtolet, ni za zrakoplov, ni za padobran, ni za remorker, ni za bojni brod, edva da je znal za kola, a najviš je pišice deral opanke. Borami je tako. Da un, el sveti Nikola, vidi čin se danaske sve vozi, bi se križal i livon i desnom, ma i nogami. Bi, bi.

I unda se lipo našal Pivac, Ivica Kranjčević, spremil kola, metnul lojtre i lengere, šarogu, pod kola uvatil Zeku i Bebu i utovaril svetoga Nikolu i sel ga u zadnji sic kaj popa i dovezal u grad. A preko sica lipo prebačena šarenica, kako i spada, pa sveti Nikola na šarenici, ima un i kiklju kako treba, a ni mitra mu ni brez veze, bi reć prava. Aj brada, brada od fate napravna. More proć. Konji gredu trapon, ploče zvekećedu po asvaltu i tako ta parada gre ulicami grada. Milina za vidit, nešto ti dojde teplo oko srca. Nu, to već sliči na svetoga Nikolu,  

I.B.