Čvika naša mila

OTOČAC – Eto, vapili smo, dobili smo beli Božić. I sadaj uživajmo u njemu. Sniga koliko oš, gradi prtine, studeno kaj padavica, loži ognje. Pa jopet radosti ako nestane, a nestane, struje, pa centralka oće puknut, pa daj akumulator, pa iscica akumulator, ma milina Božja. Snig iz krova negdi je jarnul doli, negdi se obisil, beči se i staravuj da ne bi na glavu tofnul, to vježbamo opreze. A unda neki iskidal snig ispred kuće, neki ni, narod učepal, sadaj ščvrklo, ma lako ti je nogu maknut, ma ča maknut – prebit, na zdravlje.

A jutroske miline, rečešu na radiju (pa da se i mi malo penisimo) da je u Otošcu bilo minus 10. Bilo toga vratra i više, bi reć, je da svi mi imamo svakakove teplomere, ali bilo je čvrsto. E, vakovo su vrime babe zvale – čvrsto vrime. A kase krst malo bolje u voj svojoj glavi promisli, ma ovo je, narode, čvika, prava pravcarta čvika. Jerbo reklo je da će tako bit celu nedilju dan, a kad je uitro vako ledeno, i svako jutro ledenije, a po danu sunce od koga mačke krepivadu, van da ča je to neg čvika. Začvikalo. Eto nan.

I.B.