Danaske se gre u šikalce

OTOČAC – Ča su to šikalci? Ili „šikavci“ (tako u Liki velidu), već kako ki to zove? Neki tomu velidu i „šikanci“, kaj na Kordunu, kod Slunja. Va nova dica, va nova mladost za to ni ni čula, a kamoli da gre u šikalce. Ma ni njimi do toga, imadu svega i svačesa, internet je tote, facebook je tote, twiter je tote, svaki se zabije u svoju sobu i čata, pa ča bi uni šećali po selu, ili po ulicami. Svašta!

I ča su šikalci? To je treći dan po Božiću, pada na dan Nevine dičice. Negda su u šikalce išli dičaci, a cure su čekale kaj napeta puška jabukami i orijima, već ča je ki imal. I unda bi dičaci došli na vrata i pivali sve dok in se vrata ne bi otprla. Evo nekoliko besed od ti pisam:

Otvor vrata, divojko od zlata,

I tvoja je mater otvarala,

I momke lipo darivala …

Imali su dičaci u sebe šibe i pritili da će cure istuć ako in ča ne dadu, ako in ča ne udilidu. Pritili su se besedami najprvo, a cure kaj cure, smijuljile se i žmirkale, njimi to bilo drago, a kako i ne će, to bilo njevo kino i kazalište, ti šikalci, to bil njev – disko. I unda bi une darivale dičacima jabuke, orije, ma i kaj kolačić, ako ga ne bi oganj jako ćapil pa ga ni bilo za pokaževat. A ako bi malo ili slabo dale, dobile bi šibami po leđi, al dičaci kaj dičaci, uni su nji šibami nako polako, tek toliko kaj da je. Ma kadijdu in se zamirit, jerbo eto ti i Novoga leta, pa jopet dolazidu mačkari, ma sve tamo do Čiste srede je sve za šalu, smij i vrisak. Veli naša baba Franca da pas kuje nigda ni' uil. Ča to znači, nismo se baš tomu dovrgli.

Vaj običaj se nekako zapušćal, unda su mesto dičakov u šikalce išla dica, dičačići, curice nisu išle. A dici daj manje, daj in pregršću lišnjakov, kaj kolačić i tako to. Dica bila zadovoljna. Sadaj više ni tako.

Negda bilo, sase spominjalo – viče nami naša baba Franca, a unda zna na čemu je svit stajal. E!

I.B.