Vrime je od masnice

OTOČAC – Danaske su sveta Tri kralja, a ne veli se badave Sveta Tri kralja, masnica se valja. Došlo vrime od masnice. E sadaj, ako neki ne zna ča je masnica, a nismo mu mi krivi ča je neupućen. Jerbo masnica je masnica, una spada, rećemo kaj u kolač, a jopet ni kolač. Una je, rećemo, kase speče pa još nako lipo tepla, ona je za nadrit se, una zaminjuje obrok, ni una lizi-blizi, nikakova finina. Pa kase krst naklati masnice, borme je kapac i podurat, ni man odma tašć.

A kako će i bit kad je u masnici više masti neg brašna. Jerbo profujali su božićni blagdani, pečenke odavno nema, meso se još ni prodimilo, slanina friška, pa čin se omrsit ako neš masnicon? A unda naše babe, Bog ji pomiluj, une utači dičurini, ma ne samo dičurini, već i velikomu narodu, masničinu da napuni muru. Al jopet, za masnicu treba dost masti, a masti ni do obisti, lako se una potroši pa činš brke mrsit u leto i ranu jesen? Ist suvoparno? Il zasmrdit fažol lojen morda? Ma bilo je svega.

A kako se dela masnica? Zamisi se testo, ostavi da stoji pol ure, rastače tanko (kaj za štrudel), pomaže rastopljenon mašćon, ki voli potrusi kin zrnon kimljena, i  zatače se i smota uobal i vrže u tepsiju. Peče se na tijanomu ognju malo manje od ure vrimena. More se una peć i drugovačije, more, kako je ki znal i mogal. Moglo se potrusit i cukra, ki je imal, pa bi bila slatka, a moglo se u nju vrć i narizane slanine ili još ofriške pečenice, moglo, moglo. Pa unda je neki pekal i nataraču, slično je masnici al ni jopet isto.

Masnica je bila jako štimana od Sveta tri kralja do mesopusta, pa bi narod edva dočekal da dojdedu Sveta tri kralja da more peć masnicu, a odatljen je i poteklo Sveta Tri kralja, masnica se valja.

A ta naša masnica, nju je Katedra Čakavskoga sabora pokrajine Gacke predložila Ministarstvu koloture da je vrže pod zaštitu. Već je profujala godina i pol dan, a Ministarstvo se još vajk muči s ton našon masnicon. Da je Zaher torta, već bi je rešilo, borami bi. A ne malo testa i masti, pa nikako, pa nikako. Kako je va godina sveta godina i otrpta su crkvena vrata za oprošćaj, morda kroza nji projde i Ministarstvo i naša masnica.

I.B.