Pučka veselica na Fajbanovi

OTOČAC – Minula je i Fabijanova, u radosti i veselju. Bile su dvi maše, crikva je bila puna na obe, morda malo više na večernjici. A kako i ne će bit kad je otočki plovan pripravil narodno veselje. Bilo je ila i pila, niki ni mogal ostat gladan, ma kakov gladan. Ma neka, nek narod i veseli se.

A otočki plovan, njemu se ne more pera odbit kad su veselice u pitanju, čovik to zna napravit, i gre mu od ruke, ča je, je. Da ni bilo blovana - ma niiiiš!  Sfrigal je kiseloga zelja, nakuval kobasičin, mrsa, narod donesal kolači, tote kuvanoga vina, ničesa ni falilo, ma i tičjeg mlika je bilo. Ki bi prigovoril. Bog bi ga! To je bilo za običan narod, za puk – kako bi rekla naša baba Jevica.

I unda kad je narod podmazal grlo, bilo je red zapivat  i kolo zaigrat, kaj ča je to u Otočcu vajk bilo. I okrenulo se kolo, pivalo i napivavalo, ni se smilo nako malo zešće, crikva je tote, pa je sve moralo ostat da ki besedon ne pane u grij.

Neka, Bogu fala, negda je narodu zbor bil njegov event. A nami je naša baba Jevica pripovidala da su negda, u no vrime, pred otočkon crikvon igrala i po dva-tri kola. Edno je bilo malo, pa se uvati drugo kolo, pa treće, igralo je i kolo u kolu. Ni snižina smetala, sve da je dom grkljana bila,  coklje i opanci zatabanaj, nakon kola mogal si taj nekakov okej igrat, koliko je bilo ravno, klizavo i glatko. Tako to negda, pripovidala bi nami baba Jevica još toga, al ni nami do toga. Oladi se rana.

I.B.