Cvetnica u Švici

ŠVICA – Čera je u Švici mašu držal Anđelko Zdedslav Kaćunko. A ki će drugi van un? Cvetnica je. Verni narod se naoružal granami od masline (nedaj Bože da je kakova druga grana, jok, samo maslina i ne daj Bože da je ki, samo edno, doneslo palminu granu, cela Švica bi bila u palminin granami) i došal na mašu. Jerbo ispada da ako nemaš maslinove grančurine, da ni dobro, da samo maslinova i nikva druga mora bit. A more, svaka grana more. I svaka rožica more.

Je da je ve godine snig potrpal rascvetale grane, a bilo ji je, kako ne, je da je potrpal i rožice, ako je ki u svomu vrtlacu ča imal, je da su drenjule rano procvetale i cvet jin šal. Sve je to tako, al da je sve u rožicami i rascvetalin granami, jopet bi se nosile masline.

Negda ti maslinovi gran ni bilo. Ma bilo je, donašali su Podgorci na magarcima vamo pa ki je mogal zaminil bi šalicu fažola za maslinovu grančicu (jopet bilo šteta tolik fažol davat). Tako su uni, el ti Podgorci, donašali i kapulice, pa ki je mogal i til minjal je za ča drugo, bilo je i suvi smokav na dretvi, kako ne.

Al ta vrimena prošla, davno to bilo, a sadaj je vako kako vidiomo na televizoru, borami je.

M.K.