Prošešija za svetoga Antu

OTOČAC – Čera je bil blagdan svetoga Ante. Narodu je taj svetac bil znak da je tadaj zadnje vrime za zelje posadit, dok ča kiše škrone, ako ne – red ga sadit na vodu. I sveti Ante je bil edan od svecov u kalendaru, ni zapovidani svetak i narod je delal svoj posal.

Al pok je došal plovan Goran Antunović (nomen est omen), un je već pred ku godinu u modu upeljal da se sveti Ante slavi malo bolje neg dotadaj. Kupil je i kip svetoga Ante, a onda su sagrajene i traljice na koma se more kip nosit u prošešiji oko crikve. Tako se i čera nosil iz crikve pa kroz Gačanski park rvacke mororije nazad u crikvu. A verni narod je šećal u prošešiji i nosil ljiljane, ke je plovnan nabavil pa je bilo za sve. Ljiljani su rožice svetoga Ante.

Mašu je peljal plovan Antunović a za oltaron je bil i Jure Ladišić. A crikva, crikva puna vernoga naroda, ma šibica ne bi više stala.

Lipo, plovan Antunović je upeljal edan novi običaj kaj je narod privatil. Neka.

M.K.