Švička crikva za mašu na televizoru - spremna

ŠVICA – Švica će u nedilju bit na televizoru. Borami oće jerbo će Rvacka televizija prenašat mašu baš iz Švice, došal red i na nju. To je man drugi dan nakon Rvacki mučenikov na Udbini, pa kad je televizija toten na terenu, prston su uprli u Švicu i biće maša na televizoru.

A kasu to Švičani saznali, ni mira. I kako će bit, ta ni se špotat, treba se pred sviton pokazat. Gljedaće ji cela Rvacka, a morda i šire. Red se uvatit kos, grabalj, škar od živice, trnokopov, motik, ma i traktori su imali posla pa pokosit oko crikve i plovanije. Ima šapračja, sve ča je suša, raste samo nunde kadi ne treba, a kadi treba ne će. Lipo se sve to ukrčilo, kaj potiglano, bi reć da Zrinjevac.

Ženske se uvatile red uspostavljat u crikvi, prašinu proklatit. Nema kadi bi prston uprl da ni krpon manuto. Najgore je bilo s paučinon, crikva visočka, aj dovati vraže. Imale su i trklje posla dok se paucima stalo na kraj, meso od njih otpadalo. Istina i Bog, ni se moralo toliko teretivat, na televizoru se prašina baš i ne vidi. Da je samo poć na Rvacku televiziju i vidit kakov je tamo nered, bi se krst iznenadil i križon križal. Al, eto, nek se uredi, neka.

Unda je trebalo pod oprat i naglancat. Lako to, metla i krpa pa udri. Nego bilo je da je negdi, to valja od fajtine, i zid isprval. Red je bilo špahlon sve zagladit, al unda je ostalo šaro. Ni bilo drugo neg i zid farbat pa sadaj sve izgleda kaj ispod čekića. Još kasu se crljene krpane vrgle na oltar i do oltara, crikva u Švici za televiziju – spremna.

Sadaj kad je s crikvon sv. Ivana gotovo, sadaj su na redu flizure. Ne more se doć na red u flizerajima. Lipo, treba, ni se prdačit pred sviton. I robicu lipšu obuć, mora se. Maša je maša, al televizor je televizor.

M.K.