Upeljuje se grijanje u švičku crikvu

ŠVICA – Kad je teplo, unda ti oće duša na nos izać koliko je vruće, kad je zima, unda da te i u rol vrć ni dost teplo. A tekar u crikvi! Po zimi je u crikvi kaj u ledani, skočišu se prsti od studeni pa se ne zna kako se narod križa, el po vlašku, el po kranjsku.

A ni popima ni svedno, i njimi studeno (osobito Dalmatincima). Zato je otočki plovan Goran Antunović rekal da se imadu skupljat novci za grijat švičku crikvu. I to smira domirit do kraja listopada, bi reć da će progrijat već za Sisvete. A oće li, to sam dobri Bog zna.

Čin će se to crikva grijat? Velidu da bi vrgli dvi klime od po sedam kilovati i da bi to bilo dost da se prebije zrak i da studen premre. A to i košta, kako ne. Kaj brat bratu – oko četire iljade eurov. I to brez ruk, ruke gredu na lipe oči.

Dosadaj se skupilo oko iljadu eurov, eto, ne fali na vaganu kvarta, van dvi kvarte.

M.K.