Sadaj je u švičkoj crikvi teplo kaj u raju

ŠVICA – Kase studen uvuče u zide, unda je studeno. A u crikvi po gotovo, kaj u ledani. Unda to vernomu narodu smeta, ipak tote ima starje čeljadi pa ji studen pomete po noga, ozebešu dimlja, prsti se čakoridu, oće i kašalj napast. Svakakovi muk se more krst dokopat. Zato je nekima studen bila izgovor da ne moredu u crikvu „inače bi, ma kako ne bi“.  

I unda se popi dositili jadu pa odlučili da se u crikvu metne grijanje. Najprvo je trebalo skupit četire-pet iljad eurov. Drž vamo, drž namo i borme se skupilo. E kad je novac, svaki more delat ča oće.

Došli majstori, da bi se grijanje vrglo najprvo je trebalo prordat škulju na zidu crikve. A zid debel, festung je to. Drž nedaj, pa vrtaj, vrtaj i borme se provrtala škulja kroz zid. Unda je unutri bilo sve dalje lako, šarafciger i delaj.

I sadaj je grijanje postavno, lipo ispod kore, ma ki slabije vidi ne će ga ni primetit, leglo samo tako. Al grije od crkveni vrat pa prema oltaru. I sadaj će bit teplije nima ki su zada, neg nima ki su naprvo. A ima ji ki volidu bit fort naprvo, a ni ki su vajk bili u zadnjin bancima su došli na svoje. Jerbo ki čeka taj i dočeka.

M.K.