Vako je negda pop išal po kućami

OTOČAC – Gre pop po kućami – velidu edni, gre pop po blagoslovu – velidu drugi, gre pop po blagoslovu kuć – velidu treći, gre pop po biru – velidu četvrti. I tako, neki velidu vako, neki velidu nako, a vajk sve isto. I gre(du) pop(i). Počeli uni prije Sveta tri kralja, ma edva da Božić minul, a ni tako negda bilo, ni.

Negda (negda bilo – sase spominjalo, veli nami naša baba Franca) ni pop išal po kućami nigda prije Sveta tri kralja. A jok! Ta i kako bi išal, kadi mu je svićena voda? Kadi je narodu svićena voda? A voda se blagoslivlje baš na Sveta tri kralja. I zato se i zove „trokraljska voda“, eli. A sadaj se ta trokraljska voda blagoslivlje man po Božiću da se more čin prije po kućami ić.

Negda je blagoslov kuć započimal nakon maše na Sveta tri kralja. Pop bi odabral nešto kuć uz crikvu, i to mu je bil prvi dan. I unda sve po redu, dok ne bi smiril. A moral je blagoslov završit do svetoga Fajbana. Pitali smo našu babu Francu da zač tako? A una nami da kako moremo bit tako munjeni jerbo da pop i mačkari ne moredu u isto vrime ić po kućami, a kako kod nas u Gackoj mačkari počimljedu na Fajbanovu večer, to in je početak, pa sve tamo do Pepelnice, eli, pop mora dotljen smirit blagoslov.

I kadaj pop gre po kućami, red se pripravit. – Ni to kaj danaske, popa u kuinju i – blagoslivlji pope – veli nami baba Franca. – Tako se negda ni tako delalo, borami ni. Popa se čekalo kaj popa. Pa kad bi u kuću ki važan dolazil, narod je vikal da ga se čeka kaj – popa. Eto, toliko je pop bil važan. A o današnjin popima dalo bi se svašta reć, al ni duše grišit.

I pravo baba Franca veli, popa se ni čekalo u kuinji, van u kamari. Red je bilo kuću ribat, ki je til i žuton farbon daske pomrčit. Unda je sva domaćina morala iz škrinje van. Red je bilo postelju našuškat, metnut špicane plakte (tomu sadaj velidu da kuperte), a po tomu šarenice, po podu prostrit novije krpane, nek se vidi. Na zide se čavlima popribijadu tepike, neki tomu velidu nazidnjaci. Unda na stol beli domaći krugovački tkan rub (za mlaje, to je stolnjak). Na stol raspelo, čaša svićene vode i uno čin će blagoslovit. A to uno, kako je ki til. Znalo se poć u živicu i otkinut na nekva metlica kaj od trna, to puno povuci svićene vode pa se moglo puno štrapat. Il bi se otkinul kakov pelcer od rožice, da pop puno ne smoči domaćinu, eli. I obavezno vošćena svićica na stol. Užgana!

– A kuferta? Koliko u kufertu? – pitamo mi našu babu Francu. – Kakova vražja kuferta, slobodi me Ime Isusovo!? – tuče se una u grišna prsa i čudi se. - Ja tebe niš ne razumin. – Pa to, novci, mislin, el, popu ... – Ma daj, Bog ti pamet rasvitli! Kakovi novci? Kadi su narodu u vratru novci bili? Ni imal ni za zericu petroleja kupit, a ti sanjaš o novcima. Ni to negda bilo da je svaka baba i svako dite drmalo keson, a jok! – Pa da kako unda? Ča se popu davalo? – jopet mi nju tentamo.

Una sve očimi okriće i siguro se u sebi smrtnin grijon griši, pa će: - Davalo se, davalo, ča je ki imal, tako je daval. Daj popu litru fažola, četvrtinku (za mlaje, to je frtalj vagana) žita, il kukuruza, popi su negda živad držali, ki je imal lipi jabuk, daj jabuk, ki je bil mogući odriži dva-tri suva lebra i komadić slanine, morda ki i kobasičicu, to se popu davalo. – Aaaaaa takoooo? – E, tako, tako!

Kad pop gre po kućami narod se zeru nako kaj okreši za tu priliku, muški se obrij (jerbo su se inače brijali samo na nedilju dan), presvuci novo oblačilo, ženske poveži novi rubac a ne naj kaj je sav pobljedil od starosti i sunca. I čeka se pop kaj na iglami. I od jutra rana zaviraj kadi je. Jerbo ne daj ti Bože da pop dojde a da su vrata zaprta, to nikako. Bi un prošal mimo, bi, bi, ajme pelde. Da je u vani ne znan kakova čvika, vanjska vrata moradu bit širon otvorena. Oladi se kuća, ozebi dok pop ne dojdi, trpilo se, ne ide pop svaki dan po kućami. I unda zaviraj po selu eli se kadi vidi. Kadaj ga očimi uplejaj, unda bi se otel uzdah: - Ajme, eno ga! Bože nan prosti, konda bi vidili krokodila. – Eno, eno ga kod Mande, saće k Juri, samo ča ni... Saće k nami! A un će doć morda za uru vrimena, il i duglje. Ako je to bilo oko podne, ni se ilo, ma kakov. Mogla su se dica krivit da su gladna, mogla su pomrit od gladi, dobi ćušku iza uva i „miran bit“. Jerbo to bi bil špot i sramota da se južina skrene, a pop u kuću ulazi, ma kakov!

I unda, kad pop već fort prijde, kućedomaćin u vani na prtini čeka skinutoga krljaka, drugi su u kući, zebedu uz otvorena vrata. Lipo ga pozdravi: - Faljen Isus i Marije, gospodine (jerbo se popu vikalo „gospodine“; još se samo dokturu vikalo „gospodine“ i nikomu više). I upelji ga u kuću. A verna familija za popon suknja se u nu kamaru i man na kolena. Svi! Starji muški kljekni na edno koleno, ženske i dica na obadva kolena, ruke sklopljene. Pop moli ča moli, svi š njin molidu i odgovaradu, a dok uni tako molidu, mežnjar već kregon (za mlaje: kredon) piše G + M + B i pol godine naprvo, a pol ozad ti slov. I unda pop daje spasitelja svimi da poljubidu i svićenon vodon blagoslivlje narod i kuću u koj je. I gre pop ća, a mežnjaru u vriću daj ča se već naumilo popu dat. I kad pop projdi, unda se planinka jopet griši i sve rasprema, skida tepike, šarenice, mota špicane plakte, s rubon iz stola doli, i u škrinju da se ne šundriva – do drugoga blagoslova.

A sadaj se vi pitate ki se od popa sakiral? Kasmo to pitali našu babu Francu, una samo ča ni pobenavila. – Kakovo sakiranje? Niki se ni sakiral, ni muški, a o ženskima i dici da i ne divanimo. Ni to kaj danaske, svi se razbižidu, edva da edna dušica popa dočeka. Hm, nač je vaj svit došal, c-c-c-c-c-c – vrti glavon baba Franca. – A znalo je, znalo, i prije ki od muški se isfuknut, kaj gre marvi dat ist pa ga evo, pa ga ni, pa se izgubi nekudaj – mrmlja una kaj nako zase.

Pitate se kadi je pop il kad je išal po kućami? Znalo se kadi pop i, znalo. A ka je to kuća bila, ajme časti, ta ne će pop južinat baš svagdi, eli. Tote je planinka (za mlaje, to dojde kaj domaćica) imala vratarnjega posla, trebalo je spremit južinu za popa, ni to mala stvar. - A ta južina je bila vakova – opišuje nami baba Franca. – Obavezno je zoron ranon pivac dobil nož pod vrat. Od toga će bit juva, juve mora bit. Ako je u kući bilo tuk, dobila je tuka sikiron iza vrata, od tuke je bila lipša juva. I dok pivac ili tuka vardeče u lončini, kuva se i sarma. A sa sarmon posla, Bože dragi. Treba nju lipo umisit, a ima se od česa, slanina je već prodimljena, a ima i prodimljene pečenice pa se more sarma utakat. Sarmu već knoć prvoga dana umisi da je za jutra gotova, samo nažbrijaj vode i lagano pristavi. Kad je pivac kuvan, meso izvadi, i komade mesa poslaži u sredinu pladnjenke. A okolo su išle loptice od izdrockanoga krunpira. Tako il nikako. A da bi se to moglo ist, moralo je bit i domaćega sosa, od cukra napravnoga. E, a taj sos svaka ženska ni znala napravit, ili joj kapula ne dojdi, il joj kapula pregori pa grkni taj sos, svašta je š njin znalo bit. A za juvu umisi domaće testo (ta kupovnoga ni ni bilo) i riži rizance meter dugačke, to bilo kaj štimano.

I unda je pop il najprvo juvu, pa unda kuvanoga pivca ili tuke i krunpir poljan soson, na red bi došla sarma s kuvanin krunpiron ucelo. Izaberi se poednak krunpir i lipo ga obili da ne bude iščapan. Prišparaj i pečenke od Božića, na stol pečenku, ribanoga rena i kruva. Na kraju je išal štrudel od jabuk. Eto, to je popu bila rana. I ni cela familija ila s popon, ma kakov. Samo kućedomaćin, obično to budi ded. Š njimi morda i kaj sin ako je bil oženjen, ženske jok. Planinka i nako ni mogla, una je „nosila u stol“, ni'njoj bilo do ila, a ni to ni bilo pristojno da ženski vrag sidi s popon za stolon, eli. A dicu potiraj iz sobe van, da ne zaviradu i ne obližujedu se. Eto, tako ti je to bilo – reče nami naša baba Franca kako je to negda bilo.

Bilo. Više ni. Svako vrime nosi svoje brime. Borami da.

I.B.