Baba Julika, pop i rašak

OTOČAC – Gredu popi po biru, ne znaš ki će doć, ne znaš kakovu šus ima, puno toga krst ne zna. I naša baba Julika fort zbenana, smiće se po kući kaj prdac u gaćami, da prostite, leti kaj muva brez glave.

– O, baba, ča je tebi? Daj se usedi, Bog ti dobar bil! – Ma kako ću sidit? Pop gre po kućami. – Velidu da da, ne edan, van dva. – Aaaaaa, dva?! A ča dva? To u žitku nisan čula. – Morda i tri? – I tri? A poč tri, pa naša kuća je obična kuća, nisu to banski dvori da biškup gre po biru. – Eto, tako ve godine. A ča ti tražiš, ča si izgubila. – Ma ... ma ... pretražila san škrinju – nema, pretražila san u gansku pod kozlon – nema, red će mi bit skoknut na pod morda tamo najden... – E ča to? – Pa rašak. – Rašak!?! – Aha, borami da, rašak. – Baba, da tebe ni preneslo, da ti nisi izašla iz vire Božje, a? – Nisan, nisan, al raška nema pa nema. – A koga vratra će ti rašak? – Kako koga? Pa gre li pop po kućami? – Gre. – Eto vidiš, a raška ni. – Čekaj, čekaj, da ti ne misliš popa raškon izdovaćat morda? – Bog s tobon, kadi bi ja gospodina izdovaćala, ča tebi? – Pa ča unda rašak ima z blagoslovon? – O ima, ima, kako nema. – Aj nas prosvitli da i mi drugi u kući znamo.

– Vidi vako, kad pop gre po biru, kad obavi blagoslov i krene prema vratiman da će izać, unda raškon podižuješ popu kiklju. – Kiklju mu podižuješ?! Pa ispod kiklje un ima lače, baba, dozovi se pameti, ni gole guzice. – Ma ti mene fort krivo razumiš, kaše raškon popu reverenda podižuje, undajdu konoplje bolje rast. – Konoplje? – Borami je tako. – A kadi su to tvoje konoplje? Da ji i posiješ bi ti man pulicija banula na vrata i s tobom u gerikt. To zabranjeno odavno. – Ma znan ja da je sve to tako, da konoplje niki ne sije, da š njimi niki ne će da ima posla, ni prest ni tkat. – E pa ča unda? – Običaj je običaj, da se ne utre, eto zato. Da ti, tako munjen, ča u pamet vržeš... Ma kadi mi je rašak, jadna ti san pošla?

Eto, kad pop gre po kućami pripravte rašak i podižujte popima kiklju siću konopalj. Još baba veli da je dobro lagano ga raškon i u leđa turnut, osobito kad je na vrv škalin.

I.B.